Publikimi i videove intime/ Gazetarja: Puna jonë është kur cenohet siguria kombëtare dhe abuzohet me taksat

Gazetarja Ambrozia Meta ka bërë një reagim në rrjetet sociale lidhur me publikimin e videove intime në rrjet.

Gazetarja shkruan se cenimi i sigurisë kombëtare dhe shqetësimi për qytetarët shqiptarë është kur ish-shefja e SHISH-it ka një lidhje romantike me një pjesëtar grupi kriminal dhe shpërndan sekrete shtetërore te bandat, kur gruaja e një kryebashkiaku blen të brendshme që kushtojnë sa paga minimale në Shqipëri, kur një ish-zëvendëskryeministre përdor një mik të vjetër për të fshehur vila luksoze.

Meta shprehet më tej se edhe në rastin e publikimit të videove intime, ajo që është shqetësuese nuk është kur “disa këngëtare shkojnë me një koleg të tyre”, por ai që filmon jetën intime dhe e shpërndan kudo.

Postimi i plotë:

Kur shefja e SHISH-it ka një lidhje romantike dhe intime me një pjesëtar të një grupi kriminal, fik radarët për të, shpërndan sekrete shtetërore te bandat dhe përgjon gratë e prokurorëve të dosjes, ky është cenim i sigurisë kombëtare dhe rënie e shtetit. Është puna jonë.

Kur gruaja e një kryebashkiaku blen të brendshme që kushtojnë sa paga minimale në Shqipëri, me fondet që i shoqi i jep shoqatës së saj artistike, ky është abuzim me taksat e qytetarëve dhe korrupsion. Është puna jonë.

Kur një ish-zëvendëskryeministre përdor një mik të vjetër për të fshehur vila luksoze, kjo është fshehje pasurie e krijuar nga abuzimi me pushtetin dhe taksat tona. Edhe kjo është puna jonë.

Por kur një këngëtare, apo disa këngëtare, shkojnë me një koleg të tyre, kjo është puna e tyre. Nuk cenon sigurinë tonë kombëtare dhe nuk prek xhepat tanë.

E vetmja gjë që duhet të na shqetësojë janë këta maniakë që filmojnë jetën intime të të tjerëve dhe një mentalitet që ende e quan burrin “njësh” kur e bën atë punë, ndërsa gruan “të degjeneruar” kur bën pikërisht të njëjtën gjë.

Kështu që lërini njerëzit rehat në punët e tyre dhe mos bëni si të skandalizuar.

Kujtoni Eskilin që thoshte: Është bredharak mjerimi dhe endet nga shtëpia në shtëpi. /CNA