Në kërkim ndërkombëtar nga Italia, arrestohet në Kavajë 47-vjeçari me rrezikshmëri të lartë

Një 47-vjeçar me rrezikshmëri të lartë është vënë në pranga nga autoritetet në Kavajë. Arrestimi i tij ka ardhur pasi rezulton person në kërkim ndërkombëtar pasi akuzohet nga autoritet italiane si pjesëtar i një organizate kriminale që trafikonte lëndë narkotike.  

Ai është identifikuar si Fatmir Mahmudaj. Sipas njoftimit të policisë, Interpol po punon për ekstradimin e tij në Itali.

“Policia e Shtetit/ Vijon operacioni ndërkombëtar i koduar “Fast”, finalizohet një tjetër fazë.  Kapet në Kavajë, 1 shtetas me rrezikshmëri të lartë, i akuzuar në Itali, si pjesëtar i një organizate kriminale që trafikonte lëndë narkotike.  

Në vijim të bashkëpunimit shumë të ngushtë me homologët italianë, bazuar në informacionet e shkëmbyera ndërmjet Interpol Tiranës dhe Interpol Romës, specialistët e Sektorit për Kërkimin (FAST Albania) në Drejtorinë e Forcës së Posaçme Operacionale në DPPSh, në bashkëpunim me shërbimet e Komisariatit të Policisë Kavajë, finalizuan një tjetër fazë të operacionit të koduar “Fast”, gjatë së cilës u lokalizua në Kavajë, u kap dhe u arrestua provizorisht, me qëllim ekstradimin në Itali, shtetasi me rrezikshmëri të lartë F. M., 47 vjeç.  

Ky shtetas ishte shpallur në kërkim ndërkombëtar nga Interpol Roma, pasi Gjykata e Bolonjës, Itali, më datë 25.05.2026, ka lëshuar urdhër arresti ndërkombëtar për të, për veprat penale “Organizata kriminale” dhe “Trafikimi i lëndëve narkotike”. 

Interpol Tirana po bashkëpunon me homologët në Romë, për të finalizuar procedurën për ekstradimin e shtetasit F. M., në Itali”, njofton policia.