Trump zbulon investimin prej 200 miliardë dollarësh të Koresë së Jugut në SHBA, ja çfarë përmban

Presidenti i SHBA-së, Donald Trump, zbuloi të mërkurën planet që Koreja e Jugut të investojë rreth 200 miliardë dollarë në projekte amerikane, por Seuli sugjeroi se një element kyç, një tubacion prej 54 miliardë dollarësh për një projekt LNG në Alaska, nuk ishte ende i përcaktuar.

Njoftimi nga Shtëpia e Bardhë përbënte grupin e parë të projekteve të mëdha në kuadër të një pakete më të gjerë investimesh strategjike prej 350 miliardë dollarësh që Koreja e Jugut bëri si pjesë e një marrëveshjeje tregtare me Uashingtonin vitin e kaluar. Paketa përfshinte 150 miliardë dollarë për ndërtimin e anijeve dhe 200 miliardë dollarë për investime strategjike.

“Falë marrëveshjeve që administrata ime ka siguruar me Republikën e Koresë, ata do të investojnë deri në 200 miliardë dollarë”, tha Trump nga Zyra Ovale.

Ai tha se investimi do të përfshijë ndërtimin e tetë centraleve bërthamore në shkallë të gjerë, një tubacion gazi natyror dhe një impianti të prodhimit të energjisë prej 6 gigavatësh në Teksas.

Njoftimi është i fundit në një seri marrëveshjesh ekonomike dhe investimi që Trump po i thekson përpara zgjedhjeve të mesit të mandatit të nëntorit , ndërsa kërkon të përforcojë rekordin e tij ekonomik mes shqetësimeve të votuesve për luftën e Iranit dhe çmimet e larta të benzinës.

Projekti i tubacionit mund të ketë rëndësi politike në Alaskë, ku senatori republikan Dan Sullivan përballet me një garë rizgjedhjeje konkurruese kundër demokrates Mary Peltola. Sullivan mori pjesë në njoftimin e së mërkurës.

Megjithatë, qeveria e Koresë së Jugut tha se projekti i tubacionit do të vazhdojë vetëm nëse përmbushen kushte të caktuara tregtare dhe ligjore. Seuli konfirmoi elementë të tjerë të njoftimit të Trump, duke thënë se do të investojë 22.3 miliardë dollarë në një projekt të energjisë me gaz në Teksas për të furnizuar me energji qendrat e të dhënave të inteligjencës artificiale, si dhe 120 miliardë dollarë për të ndërtuar tetë reaktorë bërthamorë.