Droni rus godet një shkollë në Kiev, shpëtojnë mrekullisht fëmijët, një i vdekur dhe dy të plagosur nga sulmet

Lajmi është bërë i ditur nga kryebashkiaku i Kievit, Vitali Klitschko, i cili deklaroi në Telegram se fëmijët ishin në strehimore dhe se shërbimet e emergjencës po shkonin në vendngjarje.

Nga sulmi janë dëmtuar gjithashtu edhe disa objekte të tjera. Mbetjet e dronit kanë goditur një magazinë, duke shkaktuar dëme materiale.

Sulmet ruse kanë shkaktuar viktima edhe në rajone të tjera të Ukrainës.

Të paktën dy gra, 60 dhe 41 vjeç, janë plagosur gjatë një sulmi rus me bombë ajrore të drejtuar ndaj një zone të banuar në qytetin e Sumyt gjatë natës. Sipas guvernatorit rajonal Serhii Kryvosheienko, sulmi goditi sektorin privat të distriktit Kovpakivskyi dhe rreth gjashtë banesa janë dëmtuar.

Ndërkohë, në rajonin e Mykolaivit, një burrë 50-vjeçar ka humbur jetën pas një sulmi me dronë ndaj komunitetit Vesnianska.

Guvernatori rajonal Heorhii Reshetilov tha se zona ishte sulmuar gjatë mbrëmjes dhe në orët e para të mëngjesit me dronë të tipit Shahed/Gerbera.

Sulmet vijnë në kuadër të një vale të re bombardimesh ruse ndaj objektivave dhe zonave të banuara në Ukrainë.

Top Channel