Vunë zjarre në Memaliaj, Lushnjë dhe Fier/ Pranga 4 autorëve të dyshuar

Arrestohen katër shtetas si autorë të dyshuar për zjarrvënie në Memaliaj, Lushnjë dhe Fier.

Policia e Gjirokastrës njofton se sot në Memaliaj u kap në flagrancë në afërsi të vatrave të zjarrit që dyshohet se ndezi në fshatin Vasjar, një shtetas i arrestuar edhe më parë nga Policia, për të njëjtin krim.

Si pasojë e përhapjes së flakëve u dogjën rreth 4000 m² sipërfaqe toke.

Shërbimet e Stacionit të Policisë Memaliaj vunë në pranga shtetasin Q. Sh., 76 vjeç.

Ndërkohë, Specialistët për Hetimin e Krimeve të Komisariatit të Policisë Fier arrestuan shtetasin D. D., 31 vjeç, banues në fshatin Pojan, Fier, pasi dje, dyshohet se ka ndezur zjarr në tokën e tij dhe për shkak të erës, zjarri është përhapur me shpejtësi, duke rrezikuar banesat dhe sipërfaqe të mëdha toke në afërsi të Parkut Arkeologjik të Apollonisë.

Ndërkohë, specialistët për Hetimin e Krimeve të Komisariatit të Policisë Lushnjë arrestuan shtetasit: 

A. S., 56 vjeç, banues në Lushnjë, pasi dyshohet se ka ndezur zjarr në servisin e tij dhe si pasojë e përhapjes së flakëve janë djegur pjesë automjetesh dhe pemë ulliri në pronën e një shtetasi tjetër;   

D. G., 49 vjeç, banues në fshatin Golem, Lushnjë, pasi dyshohet se ka ndezur zjarr në tokën e tij, për të djegur mbeturinat, por zjarri ka dalë jashtë kontrollit, duke djegur një sipërfaqe toke me bimësi të egër dhe kanale vaditëse, si dhe ka rrezikuar djegien e disa serave në afërsi./CNA