Prokuroria e Fierit njoftoi të enjten më 1 tetor sekuestrimin e 2.6 milionë eurove dhe një automjeti tip “Bentley” të zotëruara nga Kastriot Hasko, i marrë nën hetim për veprat penale “Falsifikimi i dokumenteve” dhe “Pastrimi i produkteve të veprës penale ose i veprimtarisë kriminale”. Sipas prokurorisë, Hasko, i cili gjendet aktualisht nën masën e sigurimit personal, “Arrest në shtëpi” akuzohet se, nëpërmjet vendimeve të falsifikuara ka arritur të regjistrojë sipërfaqe të konsiderueshme toke.
Nga hetimet e kryera për këtë çështje, prokuroria ka evidentuar llogaritë bankare të Haskos, ku kanë qenë në gjendje 2.6 milionë euro, 1.8 milionë lekë dhe 7515 USD. Po ashtu, në pronësi të tij është gjetur dhe një automjet i llojit “Bentley” model “Flying Spur”, vit prodhimi 2024, me vlerë blerje të deklaruar 250 mijë euro. Sipas prokurorisë, këto pasuri dyshohet se janë përfituar nga veprimet e paligjshme për të cilat Hasko është nën hetim.
Gjykata e Fierit ka pranuar kërkesën e prokurorisë për sekuestrimin e vlerave monetare dhe të automjetit.
