Bashkimi Evropian ka miratuar rregulla të reja për dëbimin e migrantëve që nuk kanë të drejtë të qëndrojnë në vendet e bllokut, duke hapur për herë të parë bazën ligjore për krijimin e qendrave të dëbimit jashtë territorit të BE-së.

Vendimi vjen ndërsa disa shtete anëtare kërkojnë masa më të forta për përballimin e flukseve migratore.

Ministrat e Brendshëm të BE-së i dhanë të enjten miratimin përfundimtar legjislacionit të ri gjatë takimit në Luksemburg.

Qendrat jashtë BE-së do të mund të përdoren për personat që kanë detyrim ligjor të largohen nga territori i Unionit, por që nuk mund të kthehen në vendet e tyre të origjinës.

Rregullat vendosin gjithashtu detyrime të reja për azilkërkuesit, kërkesat e të cilëve janë refuzuar, si dhe parashikojnë mundësinë e masave ndëshkuese në rast të mosrespektimit të tyre.

Një tjetër ndryshim lidhet me personat që konsiderohen rrezik për sigurinë kombëtare. Legjislacioni zgjeron mundësinë që ata të mbahen në ndalim deri në momentin e dëbimit.

Diskutimet në Luksemburg u zhvilluan edhe nën ndikimin e krizës së fundit migratore në Ceuta. Rreth 72 mijë migrantë kaluan kufirin drejt enklavës spanjolle në fund të korrikut brenda pak ditësh, duke shkaktuar një krizë diplomatike dhe debat mes vendeve të BE-së për mënyrën e menaxhimit të situatës.

Në shtator, presidentja e Komisionit Evropian, Ursula von der Leyen, njoftoi gjithashtu përgatitjen e një kuadri të ri evropian për reagimin ndaj krizave migratore.

Sipas propozimit, në situata kur flukset e migrantëve organizohen dhe përdoren si instrument presioni ndaj BE-së, vendet mund të lejohen të devijojnë përkohësisht nga disa prej rregullave të zakonshme të azilit.

Detajet e këtij mekanizmi nuk janë bërë ende publike, ndërsa disa qeveri evropiane po kërkojnë masa edhe më kufizuese.

Ministri i Brendshëm gjerman, Alexander Dobrindt, mbështeti vendosjen e rregullave të posaçme të azilit për situatat e krizës, duke argumentuar se në raste të caktuara mund të mos jetë e nevojshme ndjekja e procedurave standarde.