Pas publikimit dhe shpërndarjes në rrjetet sociale të disa videove intime, të cilat kanë tërhequr vëmendjen e publikut dhe kanë nxitur reagime të shumta, ka reaguar publikisht këngëtarja dhe moderatorja Rozana Radi.
Përmes një deklarate të fortë, Radi mohon kategorikisht të ketë lidhje me videot që po qarkullojnë dhe paralajmëron ndjekje ligjore ndaj kujtdo që, sipas saj, përpiqet të dëmtojë emrin dhe reputacionin e saj përmes shpifjeve apo të pavërtetave.
“Po përpiqeni në të gjitha mënyrat të bëni pis emrin e shumë njerëzve. Për mua, kjo mbaron këtu.
Për këdo që tenton të dëmtojë emrin, imazhin apo reputacionin tim përmes shpifjeve dhe të pavërtetave, do të ketë kallëzim penal dhe do të japë llogari përpara drejtësisë.
Theksoj qartë: unë nuk jam në asnjë prej videove të publikuara dhe nuk kam asnjë lidhje me videon që pretendohet.
Kam familjen time, kam partnerin tim në krah dhe kam një jetë timen. Ju lutem, mos e përdorni dhe mos e njollosni emrin tim pa asnjë bazë.
Dhe ju lutem shumë, kërkoj bashkëpunimin e të gjitha vajzave, grave dhe burrave: mos i jepni zë kësaj maskarade të poshtër që po ndodh në rrjetet shqiptare. Mos shpërndani, mos amplifikoni dhe mos i jepni jetë diçkaje që prek dinjitetin dhe emrin e njerëzve pa asnjë të vërtetë pas saj.
Nëse kjo vazhdon, do të ndjek të gjitha procedurat ligjore që më takojnë. Nga ky moment, le të flasin faktet dhe drejtësia”, shkruan Rozana Radi.
Reagimi i saj vjen në një kohë kur videot intime të personave të ndryshëm po shpërndahen në rrjetet sociale, duke shkaktuar reagime dhe shqetësim lidhur me cenimin e privatësisë dhe përdorimin e emrave të personazheve publike pa bazë.
Radi ka bërë të qartë se do të ndjekë rrugën ligjore në rast se pretendimet ndaj saj vijojnë të publikohen ose shpërndahen, ndërsa u ka bërë thirrje përdoruesve të rrjeteve sociale që të mos kontribuojnë në përhapjen e materialeve apo pretendimeve të pavërtetuara.
