Moti i keq ka goditur me intensitet të lartë ishullin e Kretës në Greqi, duke shkaktuar përmbytje masive, dalje të lumenjve nga shtrati, rrëshqitje dheu dhe probleme të shumta në rrjetin rrugor. Situata është përkeqësuar në disa zona, ndërsa autoritetet kanë mbyllur shkollat dhe kanë vendosur kufizime në qarkullim.
Nga përmbytjet ka humbur jetën një fermer 80-vjeçar, ndërsa një çift ka mbetur i plagosur. Viktima ishte raportuar e zhdukur një natë më parë dhe u gjet i pajetë në zonën Kavalaris të Rethymnos, pasi ishte mbuluar nga mbeturinat e sjella nga rrjedha e ujit.
Sipas informacioneve paraprake, 80-vjeçari ishte larguar drejt kasolles së tij ku mbante bagëtitë, por dyshohet se është marrë nga rrjedha e ujit gjatë përkeqësimit të motit.
Ndërkohë, në Livadia të Mylopotamos, një çift mbeti i plagosur pasi ujërat e rrëmbyeshme përfshinë urën e Diskourios në momentin kur ata po kalonin. Autoritetet ndërhynë për t’i nxjerrë nga zona e rrezikut.
Situata ka detyruar autoritetet të mbyllin të gjitha shkollat në Njësitë Rajonale të Hanias dhe Rethymnos. Shkolla janë mbyllur gjithashtu në Lasithi dhe në Bashkinë Minoas Pediada, ndërsa mësimi është pezulluar edhe në Agia Pelagia dhe Fodele.
Shërbimi Kombëtar Meteorologjik grek (EMY) vijon të mbajë në fuqi paralajmërimin e kuq për Kretën, pasi rreziku i përmbytjeve mbetet shumë i lartë. Në të njëjtën kohë, në Detin Egje janë regjistruar erëra shumë të forta, duke e bërë situatën edhe më të vështirë.
Përmbytje dhe evakuime në Heraklion
Probleme të mëdha janë regjistruar në zonën e Heraklionit, ku reshjet intensive kanë shkaktuar daljen nga shtrati të lumit Drakouliaris në Malades dhe Finikia.
Në Ano Finikia, situata u përshkallëzua pasi dy persona mbetën të bllokuar në një automjet. Mbeturinat e grumbulluara në rrugë penguan lëvizjen e makinës dhe dy personat u detyruan të nxirreshin prej saj dhe të transportoheshin në një vend të sigurt.
Probleme janë raportuar edhe në Gouves, ndërsa shërbimet zjarrfikëse kanë marrë dhjetëra thirrje për pompimin e ujit, prerjen e pemëve dhe largimin e qytetarëve nga zonat e rrezikshme.
Përrenjtë dhe rrjedhat ujore përbëjnë një shqetësim të veçantë, pasi reshjet e dendura kanë shkaktuar rritje të shpejtë të nivelit të ujit.
Rrëshqitje dheu dhe rrugë të bllokuara në Rethymno
Edhe Rethymno është përfshirë nga moti ekstrem. Shirat e rrëmbyeshëm kanë shkaktuar përmbytje, rrëshqitje dheu dhe dëmtime në rrjetin rrugor.
Në orët e para të mëngjesit, autoritetet u kanë bërë thirrje banorëve të kufizojnë lëvizjet dhe të shmangin rrugët drejt Zonianës, Livadias dhe zonave malore të Mylopotamos.
Në Zoniana, një shofer mbeti i bllokuar në automjetin e tij pasi një lumë doli nga shtrati. Për nxjerrjen e tij në mënyrë të sigurt u desh ndërhyrja e autoriteteve.
Zëvendësguvernatorja e Rethymnos, Maria Lioni, u ka bërë thirrje qytetarëve të tregojnë kujdes maksimal dhe të shmangin udhëtimet e panevojshme për sa kohë që reshjet intensive vijojnë.
Ndërkohë, Bashkia e Mylopotamos i ka kërkuar Ministrisë së Krizave Klimatike dhe Mbrojtjes Civile shpalljen e zonës në gjendje të jashtëzakonshme, në mënyrë që të mundësohet forcimi i ekipeve që po punojnë për hapjen e rrugëve dhe riparimin e dëmeve.
Situatë e vështirë edhe në Anogia
Moti i keq ka shkaktuar probleme të konsiderueshme edhe në Anogia. Gjatë natës janë regjistruar ndërprerje të energjisë elektrike, ndërsa reshjet dhe stuhitë kanë shkaktuar rrëshqitje dheu dhe grumbullime të mëdha balte.
Trafiku në rrugën që lidh Axos me Anogia u ndërpre përkohësisht, ndërsa ekipet e bashkisë dhe kontraktorët privatë po punojnë për largimin e mbeturinave dhe rikthimin e qarkullimit.
Në total, shërbimi zjarrfikës është angazhuar në të paktën 21 incidente në të gjithë Kretën, 15 prej tyre në Heraklion. Shumica e ndërhyrjeve lidhen me pompimin e ujërave të përmbytjeve dhe transportimin e qytetarëve drejt zonave të sigurta.
Në disa zona janë regjistruar mbi 300 milimetra shi
Intensiteti i reshjeve është evidentuar edhe nga të dhënat meteorologjike. Sipas rrjetit të stacioneve automatike të Observatorit Kombëtar të Athinës dhe meteo.gr, në zonat malore dhe veriore të Kretës janë regjistruar sasi shumë të mëdha reshjesh.
Në Anogia të Rethymnos janë matur 361.4 milimetra reshje nga e mërkura, 30 shtator, deri në mesditën e së enjtes, 1 tetor.
Për shkak të rrezikut të lartë nga përmbytjet dhe rrëshqitjet, janë mbyllur gjithashtu disa gryka dhe janë vendosur kufizime të qarkullimit në zonat më të rrezikuara.
Kryetari i bashkisë, Giorgos Athanasakis, u ka bërë thirrje banorëve të qëndrojnë në shtëpi dhe të përdorin rrugën unazore vetëm në rast nevoje absolute. Ndërkohë, në zonë janë raportuar edhe dëme të konsiderueshme në tokat bujqësore dhe të mbjellat.
Autoritetet vijojnë monitorimin e situatës, ndërsa paralajmërimi i kuq mbetet në fuqi për shkak të rrezikut të reshjeve të tjera intensive dhe përkeqësimit të situatës së përmbytjeve.