Protesta kundër qeverisë/ Qytetarët sërish në shesh: Përgjegjësia nuk mbaron me një fjalim të Ramës. Përplasen me policinë gjatë marshimit  

• Sot 124 ditë revoltë kundër qeverisë Rama. • Qytetarët janë shprehur të vendosur se nuk do e ndalin revoltën e tyre deri në largimin e Kryeministri Edi Rama nga pushteti. • Prej 124 ditësh, ata mblidhen çdo mbrëmje në Sheshin “Skënderbej” dhe më pas marshojnë drejt kryeministrisë. • Përmes fjalimeve, protestuesit kanë shprehur vazhdimisht pakënaqësitë e tyre ndaj qeverisë dhe gjithë klasës politike. • Protestuesit kanë deklaruar se nuk do të tërhiqen dhe se do të vijojnë qëndresën deri në realizimin e kërkesave të tyre. • Gjatë fjalimeve, ata janë shprehur se do ta ndjekin kryeministrin në çdo dalje publike me thirrje, vezë dhe domate dhe se do t’ia bëjnë takimet një makth sikurse ai ka vepruar me qytetarët. • Në ditën e 124-t të tubimit, protestuesi kanë dhënë mesazhet e tyre edhe përmes pankartave. • Në disa prej pankartave, qytetarët theksojnë rëndësinë për të qëndruar të bashkuar në mënyrë që të bëjnë të mundur largimin e qeverisë Rama. • Ndërsa, një pjesë tjetër e pankartave të protestuesve ironizon deklaratat e kryeministrit Rama të bëra dje gjatë konferencës së përbashkët me presidenten e Komisionit Europian, Ursula von der Leyen, ku kreu i qeverisë foli për mirëqeverisje dhe zhvillim të vendit. • Protesta e sotme u shoqërua edhe me tensione. • Ndërsa qytetarët po vijonin marshimin në rrugët e Tiranës, ata janë përplasur me forcat e policisë. • Konkretisht, situata u tensionua pranë drejtorisë së Policisë, pasi efektivët tentuan të bllokonin marshimin e qytetarëve. • Gjatë përplasjeve, qytetarët brohoritën në kor “Hapeni rrugën!”, “Polici e krimit!” • "Arrestoni Ramën", "O Ergys o legen prite Ramën se po vjen", “Edi Rama frikacak”, "Dorëheqje, ju erdhi fundi", "Policia e krimit", "Edi Rama jep dorëheqjen", "Edi Rama në burg", "O Erion o legen prite Ramën se po vjen", "Shqipëria e shqiptarëve, vdekje tradhtarëve”, “Pa rini nuk ka Shqipëri”, “Poshtë patronazhistët” dhe “Shqipëria kërkon revolucion”,  “Bashkim, organizim, rezistencë”, “Përgjegjësia jote nuk mbaron me fjalim, për çdo hajdutëri do të ketë dënim”, janë disa nga thirrjet dhe pankartat kryesore që protestuesit kanë brohoritur në kor.

3 artikuj për këtë temë.