“Këtu fle me vajzën time”, Nini: Dikush po ndjek mediat dhe po publikon videon e radhës

Drejtuesi i “Acromax”, Aldor Nini, komentoi në emisionin “Now” në Euronews Albania publikimin e videove intime të kompozitorit Adrian Hila.

Nini deklaroi se publikimi i materialeve po bëhet, sipas tij, në mënyrë të organizuar dhe nga persona që kanë njohuri profesionale në menaxhimin e informacionit dhe mediave.

“Pse ka ndodhur ky publikim? Shantazh nuk është bërë ndaj Hilës. Dje, në 12 të natës, doli një video ku thuhej: ‘Këtë e kam alarm, unë këtu fle me vajzën time’. Pra, dikush po ndjek mediat dhe po publikon videon e radhës, në mënyrë që ai ta zgjerojë narrativën që ai do që ne ta besojmë”, u shpreh Nini.

Sipas tij, mënyra dhe momenti i publikimit të materialeve ngrenë dyshime për një skenar të mirëorganizuar, edhe pse ai tha se nuk e di se kush qëndron pas publikimit.

“Ka një dorë goxha profesionale që po merret me këtë çështje. Të gjitha faqet që janë marrë në mënyrë ekstreme me revolucionin e flamingos nuk po publikojnë më për protestën, por kanë kaluar te halli i videos”, tha ai.

Nini e cilësoi situatën si një “sulm”, ndërsa theksoi se mbetet e paqartë se kush mund të jetë pas publikimit dhe shpërndarjes së materialeve intime.

“Mendoj që ky është një sulm, nuk e di se nga kush”, përfundoi ai.