Rritja e çmimeve/ SHBA, presion Europës mbi rezervat e naftës

Shtetet e Bashkuara të Amerikës u kanë kërkuar të enjten aleatëve të tyre europianë, veçanërisht Gjermanisë dhe Francës, që të lirojnë menjëherë rezervat e tyre të naftës, me synimin për të ulur çmimet e larta të karburantit.

Kërkesa vjen pasi Trump deklaroi të mërkurën se SHBA mund të shqyrtojë ndalimin e eksporteve amerikane të naftës, në përpjekje për të frenuar rritjen e çmimeve.

Sekretari amerikan i Energjisë, Chris Wright, tha se ishte shumë i bindur se Europa mund të ndihmonte në uljen e çmimeve duke përdorur rezervat e saj emergjente të naftës.

Ndërkohë, sekretari amerikan i Thesarit, Scott Bessent, tha se SHBA-ja tashmë ka përmbushur pjesën e saj të një marrëveshjeje të arritur në mars mes vendeve anëtare të Agjencisë Ndërkombëtare të Energjisë (IEA), duke nxjerrë në treg 172 milionë fuçi rezerva amerikane të naftës.

“Amerika po bën pjesën e saj”, deklaroi Bessent, duke u bërë thirrje aleatëve të veprojnë në përputhje me angazhimet e tyre.

Edhe përfaqësuesi amerikan për Tregtinë, Jamieson Greer, tha se ekziston vullnet nga të dyja palët për të bashkëpunuar për rritjen e furnizimit me naftë.

Nga ana tjetër bëhet me dije se task-forca e energjisë e Bashkimit Europian do të zhvillojë një takim urgjent të premten në mëngjes për të diskutuar situatën. Komisioni Europian tha se tregu i naftës është aktualisht shumë i ngushtë dhe se kjo ka sjellë rritje të çmimeve për konsumatorët në mbarë botën.

Zyrtarët europianë po koordinohen me vendet anëtare dhe me IEA-n për të vlerësuar situatën dhe për të përcaktuar masat e mundshme. Komisioneri europian për Energjinë, Dan Jorgensen, ka qenë në kontakt me autoritetet e Francës, Gjermanisë, Italisë, Irlandës dhe Britanisë së Madhe për të koordinuar qëndrimet.

Ndërkohë, komisioneri europian për Tregtinë, Maros Sefcovic, tha se një ndalim i eksporteve amerikane të naftës do të ishte “i papritur për europianët” dhe mund të kishte pasoja shumë të mëdha për ekonominë europiane. /CNA