Donald Trump kaloi disa orë duke përdorur Grok-un, chatbot-in e inteligjencës artificiale të krijuar nga Elon Musk, për të diskutuar situatën në Venezuelë, rreth një muaj përpara operacionit amerikan për arrestimin e presidentit të atëhershëm venezuelian, Nicolas Maduro.
Të lidhura
None found
Detajet janë publikuar nga revista Time në një material të gjerë për veprimtarinë e Trump-it gjatë mandatit të tij të dytë në Shtëpinë e Bardhë. Duke iu referuar një burimi brenda qarqeve të Uashingtonit, revista shkruan se presidenti e pyeti Grok-un se si mund të reagonin qytetarët e Venezuelës në rast se Shtetet e Bashkuara do të arrestonin kreun e tyre të shtetit.
Sipas përgjigjes që dyshohet se mori Trump, një numër i madh venezuelianësh do ta festonin largimin e Maduro-s.
Time raporton se bisedat u zhvilluan gjatë një takimi privat mes Trump-it dhe Musk-ut në Zyrën Ovale, në dhjetor 2025. Përveç çështjes së Venezuelës, presidenti thuhet se e përdori Grok-un për orë të tëra edhe për pyetje mbi presidencën dhe trashëgiminë e tij.
Pas kapjes së Maduro-s nga ushtria amerikane më 3 janar dhe festimeve që pasuan, Trump dyshohet se mbeti i impresionuar nga saktësia e parashikimit të chatbot-it, shkruan revista.
Nuk dihet nëse përgjigjet e marra nga Grok-u përpara operacionit ndikuan te vendimi i Trump-it. Raporti nuk përcakton nëse chatbot-i pati ndonjë rol në qëndrimin e presidentit dhe nuk lë të kuptohet se ai u përfshi në planifikimin ushtarak të operacionit.
