Pavarësisht rritjes së numrit të automjeteve në qarkullim, një pjesë e konsiderueshme e shqiptarëve deklarojnë se nuk kanë mundësi financiare për të blerë një makinë personale.
Sipas të dhënave të Eurostat, 41% e shqiptarëve deklaruan në vitin 2023 se nuk mund të përballonin blerjen e një automjeti personal. Kjo përqindje është dukshëm më e lartë se mesatarja e Bashkimit Europian, e cila ishte 5.6% në vitin 2023 dhe 5.5% në vitin 2025.
Shqipëria regjistron gjithashtu përqindjen më të lartë në rajon. Në Serbi, 16% e popullsisë deklaroi në vitin 2023 se nuk mund të blinte një automjet, ndërsa në vitin 2025 kjo shifër ra në 15%.
Në Maqedoninë e Veriut, 13% e popullsisë deklaroi se nuk mund të përballonte blerjen e një automjeti, sipas të dhënave për vitin 2024. Në Malin e Zi, përqindja ishte edhe më e ulët, 8.9%. Për Bosnjë-Hercegovinën dhe Kosovën nuk ka të dhëna të disponueshme.
Përqindja më e lartë në Shqipëri raportohet te personat që jetojnë vetëm. Sipas të dhënave, 66% e meshkujve dhe 88% e femrave në këtë kategori deklarojnë se nuk kanë mundësi të blejnë një makinë.
Ndërkohë, vitet e fundit numri i automjeteve në qarkullim është rritur ndjeshëm. Rreth 100 mijë makina janë regjistruar për herë të parë në secilin prej viteve 2024 dhe 2025, por Shqipëria vijon të ketë një numër relativisht të ulët automjetesh në raport me popullsinë.
Sipas të dhënave të Drejtorisë së Përgjithshme të Shërbimeve të Transportit Rrugor (DPSHTRR), në fund të vitit 2025 në Shqipëri qarkullonin rreth 847 mijë autovetura personale.
Në raport me popullsinë, kjo përkthehet në rreth 360 autovetura për 1,000 banorë. Shifra është dukshëm më e ulët se mesatarja e Bashkimit Europian, prej 578 automjetesh për 1,000 banorë.
Pas rishikimit në ulje të të dhënave për popullsinë, Shqipëria renditet e treta në rajon për numrin e automjeteve për 1,000 banorë, pas Malit të Zi me 442 dhe Serbisë me 394. Pas Shqipërisë renditen Maqedonia e Veriut dhe Bosnjë-Hercegovina, me nga 338 automjete për 1,000 banorë.
Në Europë, sipas këtyre të dhënave, Kosova ka 241 automjete për 1,000 banorë, ndërsa Turqia 203.
Numrin më të lartë e ka Italia, me 709 automjete për 1,000 banorë, e ndjekur nga Finlanda me 671 dhe Qipro me 670.
Europa
Sipas Eurostat, në vitin 2025, 5.5% e popullsisë së Bashkimit Europian jetonte në familje që deklaronin se nuk kishin mundësi financiare për të zotëruar një makinë për përdorim personal.
Përqindja më e lartë u regjistrua në Finlandë, me 11.3%, e ndjekur nga Hungaria me 10.4% dhe Bullgaria me 10%.
Në anën tjetër, nivelet më të ulëta u shënuan në Qipro, me 1.6%, Slloveni me 1.7% dhe Kroaci me 2.6%.
Treguesi mat pjesën e popullsisë që jeton në familje të cilat deklarojnë se nuk kanë mundësi financiare të zotërojnë një makinë për përdorim personal.
