Aktori i njohur amerikan Jim Carrey është martuar me partneren e tij prej disa vitesh, Min Ah, në një ceremoni të vogël dhe private në Los Angeles. Lajmi për martesën e 64-vjeçarit u bë publik të enjten, ndërsa çifti kishte bërë daljen e parë publike së bashku në shkurt, gjatë ceremonisë së Çmimeve César në Paris.
Carrey dhe Min Ah, aktore dhe artiste me bazë në Los Angeles, e kishin mbajtur marrëdhënien kryesisht larg vëmendjes së mediave. Të dy ishin parë së bashku që prej vitit 2022, por vetëm këtë vit vendosën të shfaqeshin publikisht si çift. Gjatë fjalimit të tij në Çmimet Cesar, Carrey i kushtoi disa fjalë partneres së tij, duke e cilësuar si “shoqen time të mrekullueshme” dhe duke i shprehur publikisht dashurinë. Në të njëjtin fjalim, aktori falënderoi edhe vajzën e tij, Jane, dhe nipin e tij.
Kjo është martesa e tretë për yllin e “The Mask”, “Dumb and Dumber” dhe “The Truman Show”. Carrey u martua për herë të parë në vitin 1987 me aktoren Melissa Womer, me të cilën pati vajzën Jane. Çifti u divorcua në vitin 1995. Një vit më pas, ai u martua me aktoren Lauren Holly, por martesa zgjati më pak se një vit. Vitet e fundit, Carrey është tërhequr ndjeshëm nga Hollywoodi dhe i është përkushtuar më shumë pikturës dhe artit. Martesa me Min Ah shënon një kapitull të ri në jetën e aktorit, i cili sot e mban jetën private larg vëmendjes publike.
