Kreu i ILD-së në Uashington, takim në DASH: Diskutime për drejtësinë dhe llogaridhënien

Inspektori i Lartë i Drejtësisë, Artur Metani, po zhvillon një vizitë pune në Uashington D.C., ku ka zhvilluar takime me përfaqësues të institucioneve amerikane.

Në kuadër të vizitës, Metani është pritur në Departamentin amerikan të Shtetit, ku është takuar me Amy Carnie, Drejtoren e Zyrës për Evropën Perëndimore dhe Qendrore.

Përmes një postimi në rrjetin social X, Metani ka bërë të ditur se gjatë takimit është diskutuar mbi punën e Inspektorit të Lartë të Drejtësisë në forcimin e llogaridhënies dhe përgjegjshmërisë në sistemin gjyqësor shqiptar.

“Shpreha mirënjohjen për vlerësimin e saj për punën e Inspektorit të Lartë të Drejtësisë në forcimin e llogaridhënies dhe përgjegjshmërisë në sistemin gjyqësor të Shqipërisë”, shkruan Metani.

Sipas tij, gjatë takimit është rikonfirmuar rëndësia e vijimit të bashkëpunimit dhe mbështetjes për avancimin e shtetit të së drejtës, forcimin e institucioneve të drejtësisë dhe konsolidimin e mëtejshëm të parimeve të llogaridhënies dhe integritetit institucional.