Tokio vazhdon të jetë një nga qytetet ku moda e rrugës nuk funksionon vetëm si kopje e asaj që shfaqet në runway. Një redaktore e një portali ndërkombëtar kaloi pesë ditë në qytet për të parë çfarë veshin realisht njerëzit dhe punoi me ekspertin japonez të stilit Takashima për të kuptuar logjikën pas kombinimeve.
Në vend të një mikrotrendi të vetëm, eksperienca u përmblodh në katër shtylla të stilit japonez. Vëmendja shkon te mënyra se si ndërtohet i gjithë kombinimi, proporcioni, shtresat, balanca mes pjesëve dhe zgjedhja e elementeve që e bëjnë një veshje personale, jo thjesht aktuale.
Kjo është edhe arsyeja pse street style i Tokios vazhdon të përdoret si referencë jashtë Japonisë. Një person mund të jetë minimalist, një tjetër maksimalist dhe një tjetër të kombinojë vintage me marka bashkëkohore, pa qenë e nevojshme që të tre të ndjekin të njëjtën formulë.
Edhe shopping-u luan rol. Tokio ka një ekosistem të madh dyqanesh vintage, marka vendase dhe zona ku stilet ndryshojnë brenda të njëjtit qytet. Rezultati është një garderobë që mund të ndërtohet më shumë rreth identitetit personal sesa rreth pyetjes “çfarë është trend këtë muaj?”.
Në një moment kur rrjetet sociale mund ta bëjnë një trend global brenda pak ditësh, kjo është ndoshta pjesa më interesante e stilit japonez, inspirimi nuk ka pse të përfundojë në uniformitet. Mësimi nga Tokio nuk është të blesh katër produkte të reja, është të mendosh më shumë për mënyrën se si i vesh ato që ke.
