Erkan Nika, inxhinieri i dytë në bordin e anijes turke “Aroyat”, e cila raportohet se u sulmua në Detin e Zi, rezulton i zhdukur. Inxhinieri me origjinë shqiptare nuk ishte mes anëtarëve të ekuipazhit të shpëtuar pas incidentit, ndërsa familja e tij po kërkon informacion për vendndodhjen dhe gjendjen e tij.
Anija “Aroyat”, pjesë e flotës së kompanisë “Aroyat Management”, me seli në Stamboll dhe e operuar nga “Kiva Marine”, kishte në bord 16 anëtarë ekuipazhi: 7 egjiptianë, 6 sirianë dhe 3 turq, mes të cilëve edhe Erkan Nika.
Sipas raportimeve, anija u sulmua nga një dron më 27 shtator 2026, pranë portit rus të Novorossiysk në Detin e Zi. Sulmi shkaktoi dëme të konsiderueshme dhe një zjarr shpërtheu në pjesën e pasme të anijes. Pretendimet se sulmi u krye nga forcat ukrainase nuk janë konfirmuar zyrtarisht.
Pas incidentit nisën operacionet për evakuimin e ekuipazhit dhe reagimin ndaj zjarrit. Megjithatë, emri i Erkan Nikës nuk figuroi mes personave të shpëtuar.
Vëllai i tij, Erizon Nika, ka bërë thirrje për ndihmë përmes rrjeteve sociale, duke deklaruar se familja nuk ka asnjë informacion për vendndodhjen apo gjendjen shëndetësore të Erkanit.
“Vëllai im nuk ishte midis ekuipazhit të shpëtuar. Aktualisht nuk kemi asnjë informacion në lidhje me vendndodhjen apo shëndetin e tij. Në kaosin e sulmit, ai mund të jetë në një spital në Rusi ose diku në terren. Ne kërkojmë urgjentisht ndihmë nga kushdo që e pa, dëgjoi diçka ose kontaktoi autoritetet”, shkruan ai.
Anija “Aroyat”, e dëmtuar rëndë gjatë incidentit, po tërhiqet drejt Turqisë me anë të rimorkiatorëve. Sipas familjes, është kërkuar që gjatë kontrollit të anijes të kryhet një inspektim i detajuar, veçanërisht në dhomën e motorëve, zonat e banimit dhe të gjitha hapësirat e mbyllura.
“Pritja dhe kërkesa jonë më e madhe është që së pari të kërkohet vëllai im; që dhoma e motorëve të anijes, zonat e banimit dhe të gjitha pjesët e mbyllura të kontrollohen me kujdes. Ne shpresojmë ta gjejmë vëllain tim gjallë deri në momentin e fundit”, shprehet Erizon Nika.
Ndërkohë, raportimet lidhur me fatin e ekuipazhit mbeten kontradiktore. Disa publikime kanë raportuar për viktima, ndërsa burime të tjera kanë thënë se nuk ka pasur të vdekur. Deri tani nuk ka një deklaratë zyrtare që të konfirmojë këto raportime, ndërsa familja e Erkan Nikës vijon ta konsiderojë atë të zhdukur.
“Aroyat” raportohet se operohet nga “Kiva Marine”, me seli në Stamboll. Anija ishte ndër mjetet e para tregtare që përdori korridorin e përkohshëm detar të Ukrainës në vitin 2023 dhe mori pjesë në rifillimin e eksporteve të drithërave nga porti i Chornomorsk pas përfundimit të Iniciativës së Drithërave të Detit të Zi.