Ambasada Amerikane në Tiranë ka zhvilluar pritjen e mirëseardhjes për ambasadorin Eric Wendt, në një event të organizuar në ambientet e një hoteli në zonën e ish-Bllokut, nën masa të forta sigurie.
Në pritje ishin të ftuar rreth 130 persona, mes tyre edhe Presidenti i Republikës, Bajram Begaj. Pjesë e eventit ishin përfaqësues të politikës, zyrtarë të institucioneve shtetërore, ministra, drejtues të organeve të drejtësisë, si dhe personalitete nga fusha të ndryshme.
Mes të pranishmëve ishte kryetari i grupit parlamentar të Partisë Demokratike, Gazment Bardhi, i shoqëruar nga deputeti Oerd Bylykbashi. Ftesë kishte marrë edhe kreu i grupit parlamentar socialist, Taulant Balla, i cili gjithashtu mori pjesë në pritje.
Në event ishin edhe ish-kryetarja e Kuvendit, Elisa Spiropali, së bashku me deputetin Bledi Çuçi, kryetar i Komisionit Parlamentar për Çështjet e Brendshme dhe Mbrojtjen.
I pranishëm ishte edhe ministri i Jashtëm, Ferit Hoxha, i cili ishte ndër zyrtarët e parë që takoi ambasadorin Wendt pas mbërritjes së tij në Tiranë.
Gjatë mbrëmjes vijuan të mbërrinin edhe zyrtarë të tjerë të lartë, mes tyre ministri i Energjisë dhe Infrastrukturës, Enea Karakaçi, ministri i Kulturës, Blendi Gonxhe, ministri i Drejtësisë, Toni Gogu dhe ministrja Mirela Kumbaro.
Në listën e të ftuarve ishin edhe përfaqësues të komuniteteve fetare. Në pritje mori pjesë edhe Kryegjyshi Botëror i Bektashinjve, Baba Mondi.
Ndërkohë, kryetari i PD-së, Sali Berisha, nuk ishte i pranishëm në event, pasi, siç kishte deklaruar më herët, nuk kishte marrë ftesë për pritjen./Versus.al
