Çështja e dënimit të Mançester Sitit po merr përmasa përtej futbollit, pasi Emiratet e Bashkuara Arabe kanë paralajmëruar qeverinë britanike se sanksionet ndaj klubit mund të ndikojnë në investimet e ardhshme të Abu Dhabit në Mbretërinë e Bashkuar.
Sipas “Bloomberg”, zyrtarë emiratas kanë paralajmëruar palën britanike se vendimi dhe sanksionet që pritet të vendosen ndaj Mançester Sitit mund të ndikojnë në interesin e Emirateve për investime dhe marrëveshje të mëdha në Britani.
Mançester Siti, në pronësi të Abu Dhabi United Group që prej vitit 2008, është shpallur fajtor nga një komision i pavarur i Premier League për shkelje të rregullave financiare gjatë një periudhe nëntëvjeçare, nga sezoni 2009/10 deri në 2017/18. Komisioni konstatoi, ndër të tjera, përdorimin e marrëveshjeve të konsideruara fiktive me sponsorë për të rritur artificialisht të ardhurat dhe për të ulur kostot.
Premier League ka bërë të ditur se komisioni e gjeti klubin fajtor për të gjitha akuzat që lidhen me shkeljet serioze financiare dhe për shumicën e akuzave lidhur me mosbashkëpunimin me hetimin. Sanksionet përfundimtare ndaj klubit ende nuk janë përcaktuar.
Mançester Siti i ka kundërshtuar gjetjet dhe ka dorëzuar një apelim ndaj vendimit. Klubi ka deklaruar se beson se ekzistojnë prova që mbështesin pozicionin e tij dhe se vendimi përmban gabime materiale.
Raportimet për ndikimin e mundshëm në marrëdhëniet ekonomike britaniko-emiratas vijnë në një kohë kur Emiratet e Bashkuara Arabe janë investitorë të rëndësishëm në ekonominë britanike. Sipas raportimeve, zyrtarë emiratas kanë shprehur shqetësimin se mënyra se si do të trajtohet çështja e Mançester Sitit mund të ndikojë në interesin për investime të tjera të mëdha në vend.
Ndërkohë, çështja pritet të vazhdojë përmes procesit të apelimit, ndërsa sanksionet ndaj klubit do të përcaktohen veçmas.
Përplasja rreth çështjes së Mançester Sitit po shihet kështu edhe në një kontekst më të gjerë, pasi pronësia e klubit nga Abu Dhabi dhe pesha e investimeve emiratas në Britani e kanë bërë çështjen të rëndësishme jo vetëm për futbollin, por edhe për marrëdhëniet ekonomike mes dy vendeve.