Belgjika fitoi 3-0 ndaj Turqisë në Ligën e Kombeve, në një ndeshje ku Kevin De Bruyne ishte protagonisti kryesor me dy gola.

Belgjika zhbllokoi sfidën në minutat e para pas një aksioni të bukur mes De Bruyne dhe Dodi Lukebakios. Mesfushori belg mori topin në hyrje të zonës dhe, pasi kaloi mes këmbëve të një mbrojtësi turk, goditi saktë në cepin e poshtëm, duke i dhënë avantazhin skuadrës së tij.

Turqia reagoi dhe pati disa mundësi për të barazuar. Arda Güler krijoi rrezik me goditjet e dënimit, ndërsa Merih Demiral dhe Abdulkerim Bardakci iu afruan golit me kokë. Në fundin e pjesës së parë, Demiral humbi një mundësi të artë pranë portës.

Në pjesën e dytë, Belgjika gjeti golin e dytë. Youri Tielemans fitoi topin në mesfushë dhe ia pasoi De Bruyne, i cili me një goditje perfekte me hark e dërgoi topin në trekëndësh, duke realizuar dopietën personale.

Turqia vijoi të kërkonte golin, por pa sukses. Belgjika vulosi fitoren në fund, kur një goditje dënimi e ekzekutuar shpejt nga Charles De Ketelaere u dërgua në zonë, ku Romelu Lukaku e shtyu topin në rrjetë.

Në fund, Belgjika triumfoi 3-0, ndërsa De Bruyne u shpall lojtari i ndeshjes.