Indeksi i Holafly për Nomadët Dixhitalë 2026 (Digital Nomad Friction Index 2026) analizoi faktorë të tillë si kompleksiteti i vizave, aksesi në shërbimet bankare, kujdesi shëndetësor dhe kostoja e jetesës.
Të bëhesh një nomad dixhital është një synim për shumë njerëz që punojnë në distancë, por pengesat që duhet të kapërcejnë për ta realizuar këtë ndryshojnë shumë nga një vend në tjetrin.
Burokracia mund të jetë një pengesë e madhe në çdo vend, por disa destinacione po e bëjnë më të lehtë jetën për ata që duan të vendosen dhe të punojnë jashtë vendit të tyre.
Tashmë dimë se cilat vende po e bëjnë më të thjeshtë këtë proces, falë Digital Nomad Friction Index 2026 të Holafly.
Kompania eSIM analizoi 17 destinacione të njohura për nomadët dixhitalë, duke shqyrtuar faktorë të tillë si kompleksiteti i procedurave të vizave, aksesi në shërbimet bankare, kujdesi shëndetësor, lidhja me internetin, kostoja e jetesës dhe rreziku nga ndërprerjet apo ngjarjet që mund të cenojnë jetën dhe punën e përditshme. Bazuar në këta tregues, u krijua një rezultat i përgjithshëm që mat vështirësitë me të cilat përballen nomadët dixhitalë.
Vendet ku është më e lehtë të jetosh si nomad dixhital
Pas analizimit të të gjithë treguesve, një destinacion doli në krye me nivelin më të ulët të pengesave: Gjeorgjia.
Vendi i Kaukazit nuk kërkon regjistrim të detyrueshëm të vendbanimit dhe as pajisjen me një numër identifikimi tatimor. Gjithashtu, një llogari bankare mund të hapet brenda pak orësh vetëm me një pasaportë, duke e bërë procesin burokratik shumë të thjeshtë.
Në vendin e dytë renditet Peruja, falë kategorisë së lejes së qëndrimit Rentista, e cila mundëson qëndrim të përhershëm pa afat, me një prag relativisht të ulët të ardhurash. Megjithatë, vendi humbi kreun e renditjes për shkak të ekspozimit ndaj tërmeteve dhe fenomenit klimatik El Niño.
Në vendin e tretë renditet Afrika e Jugut, ku për personat jorezidentë nuk kërkohet regjistrimi i detyrueshëm i adresës apo një numër identifikimi tatimor. Megjithatë, vendi humbi pikë për shkak të vlerësimit nën mesataren për sistemin e kujdesit shëndetësor.
Tajlanda dhe Malajzia renditen përkatësisht në vendin e katërt dhe të pestë. Programet e posaçme të vizave për nomadët dixhitalë dhe pengesat relativisht të moderuara për përdorimin e shërbimeve bankare janë ndër avantazhet e tyre, ndërsa ekspozimi ndaj fatkeqësive natyrore është ndër faktorët negativë.
Vendet e vetme europiane që arritën të futeshin në dhjetëshen e parë ishin Kroacia, Hungaria dhe Portugalia, të renditura përkatësisht në vendin e shtatë, të tetë dhe të nëntë. Të tria kanë programe vizash për nomadët, por kërkesat për regjistrim të detyrueshëm dhe pajisjen me numër identifikimi tatimor i penguan të renditeshin më lart.
10 vendet ku është më e lehtë të vendosesh si nomad dixhital
1. Gjeorgjia
2. Peruja
3. Afrika e Jugut
4. Tajlanda
5. Malajzia
6. Vietnami
7. Kroacia
8. Hungaria
9. Portugalia
10. Emiratet e Bashkuara Arabe
/ Euronews
