Protestat e studentëve të shkollave të mesme vijojnë në Francë, pavarësisht përpjekjeve të qeverisë për të hapur dialog dhe reagimit të fortë të autoriteteve.
Unioni Sindikal i Liceistëve u takua me ministrin e Arsimit, Édouard Geffray, por pas përfundimit të bisedimeve drejtuesit e sindikatës deklaruan se nuk kishin marrë “propozime konkrete”. Presidenti i organizatës, Ryad Rani, bëri thirrje për vazhdimin e mobilizimit.
Lëvizja protestuese, e cila nisi nga liceu Saint-Exupéry në Créteil, është përhapur në qindra institucione arsimore në të gjithë vendin.
Mbi 5 mijë arrestime që nga fillimi i protestave
Sipas ministrit të Brendshëm, Laurent Nuñez, vetëm gjatë së premtes policia kreu 1747 arrestime.
Në total, që prej nisjes së protestave të hënën, numri i personave të arrestuar ka kaluar 5 mijë.
Situata është shoqëruar edhe me përplasje mes protestuesve dhe forcave të rendit në disa qytete, përfshirë Parisin dhe Strasburgun.