Gjykata e Elbasanit ka rrëzuar kërkesën e producentit Petri Bozo për zbutjen e masës së sigurisë nga “arrest në shtëpi” në “detyrim paraqitjeje”.
Sipas mediave, Bozo kishte kërkuar ndryshimin e masës së sigurisë me argumentin se nga 24 tetori deri më 6 nëntor duhet të ishte i pranishëm në eventin “Miss Globe” në Tajlandë. Në gjykatë ai kishte paraqitur edhe ftesat përkatëse për aktivitetin.
Kërkesa nuk është pranuar nga Gjykata e Elbasanit. Gjyqtarja Suela Lika ka vlerësuar se nuk ekzistojnë kushtet dhe rrethanat për ndryshimin e masës së sigurisë, duke lënë në fuqi “arrestin në shtëpi” ndaj producentit.
Petri Bozo u arrestua pas një aksidenti të ndodhur paraditen e 25 majit, në aksin nacional Elbasan-Librazhd, ku automjeti që drejtonte përplasi për vdekje një 7-vjeçar. Fëmija po kalonte rrugën së bashku me nënën e tij, pasi kishin shoqëruar motrën në shkollë.
Pas ngjarjes, Bozo ka dëshmuar në polici se nuk e kishte vënë re fëmijën, edhe pse po lëvizte me shpejtësi të ulët.
Ndërkohë, sipas informacioneve të publikuara, familjarët e viktimës kanë deklaruar se nuk kanë pasur asnjë konflikt me producentin, duke theksuar se aksidenti “nuk ka ardhur si rezultat i një veprimi të qëllimshëm”.