Një 27-vjeçar është arrestuar në Mamurras, pasi dyshohet se qarkullonte i armatosur dhe nuk iu bind urdhrit të policisë për të ndaluar. Sipas policisë, Edmir Xhaferri ka tentuar të largohet me shpejtësi sapo ka parë shërbimet e uniformuara, duke përplasur automjetin e shërbimeve të policisë dhe duke hedhur armën e zjarrit që mbante me vete.
Ngjarja ka ndodhur në kuadër të operacionit policor të koduar “Target”, të zhvilluar nga Sektori për Krimet e Rënda, në bashkëpunim me Seksionin e Mbështetjes Operacionale në DVP Lezhë dhe Komisariatin e Policisë Kurbin. Sipas njoftimit zyrtar, policia kishte siguruar më herët informacion se 27-vjeçari qarkullonte i armatosur.
Xhaferri u lokalizua në qytetin e Mamurrasit, ku, sipas policisë, në momentin që ka parë efektivët ka vijuar lëvizjen me shpejtësi. Gjatë largimit, ai ka përplasur automjetin e shërbimeve të policisë, duke rrezikuar jetën e punonjësve, ndërsa më pas ka hedhur armën.
Pas disa minutash ndjekjeje, 27-vjeçari është kapur në lagjen “Zef Hoti” në Mamurras dhe është vënë në pranga.
Gjatë operacionit, policia sekuestroi një pistoletë, një municion luftarak, automjetin me të cilin qarkullonte 27-vjeçari dhe një palë targa.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.