Këngëtari fierak Erind Xhaferi është paraqitur në Gjykatën e Shkallës së Parë të Juridiksionit të Përgjithshëm Fier, ku pritet të njihet me masën e sigurimit personal pas arrestimit nga Policia e Fierit.
Ndaj Xhaferit është ngritur dyshimi për kryerjen e veprës penale të parashikuar nga neni 108 i Kodit Penal, “Vepra të turpshme”.
Sipas të dhënave paraprake, hetimi ndaj tij ka nisur pas një telefonate të bërë nga disa vajza të mitura në sallën operative të Policisë së Fierit. Pas marrjes së informacionit, shërbimet e Komisariatit të Fierit kanë kryer verifikimet në terren dhe kanë ndërmarrë veprimet operacionale për dokumentimin e rastit.
Xhaferi është arrestuar në flagrancë, ndërsa materialet procedurale i janë referuar Prokurorisë së Fierit për veprime të mëtejshme.
Seanca për caktimin e masës së sigurimit po zhvillohet me gjyqtar Noel Veizi, ndërsa çështja përfaqësohet nga prokurori Skerdi Sinanaj.
Në përfundim të seancës pritet vendimi i gjykatës për masën e sigurimit ndaj këngëtarit.