Filmi i parë i “Game of Thrones” i realizuar për kinema, “Aegon’s Conquest”, ka tashmë një datë zyrtare publikimi. Warner Bros. ka njoftuar se filmi do të shfaqet në kinema më 1 qershor 2029.
Filmi do të tregojë historinë e Aegon I Targaryen, i njohur si Aegon Pushtuesi, dhe fushatën e tij për të bashkuar mbretëritë e Westeros nën sundimin e dinastisë Targaryen. Ngjarjet zhvillohen rreth 300 vjet para historisë së serialit origjinal.
Regjisori i filmit do të jetë Owen Harris, i cili ka drejtuar disa episode të “A Knight of the Seven Kingdoms”, ndërsa skenari është shkruar nga Beau Willimon, krijuesi i “House of Cards” dhe një prej skenaristëve të “Andor”.
“Aegon’s Conquest” do të sjellë për herë të parë në ekran Aegon I Targaryen. Ai do të shfaqet së bashku me motrat dhe bashkëshortet e tij, Visenya dhe Rhaenys, si dhe dragonjtë e tyre Balerion, Vhagar dhe Meraxes.
Deri tani nuk është bërë i ditur kastingu dhe nuk është konfirmuar se kur do të nisë zyrtarisht produksioni. Historia pritet të bazohet në materialin e George R.R. Martin nga “Fire & Blood”.
Filmi do të zgjerojë më tej universin e “Game of Thrones”, pas “House of the Dragon” dhe “A Knight of the Seven Kingdoms”. Sezoni i dytë i këtij të fundit pritet të transmetohet në vitin 2027, ndërsa sezoni i fundit i “House of the Dragon” është planifikuar për vitin 2028.
