Evra në mbrojtje të Cristiano Ronaldos: Nuk mund të hedhësh poshtë 25 vite histori, respektojeni
Patrice Evra ka dalë në mbrojtje të Cristiano Ronaldos pas situatës së krijuar rreth largimit të tij nga grumbullimi i Portugalisë, duke kritikuar mënyrën se si është trajtuar një prej futbollistëve më të mëdhenj në historinë e këtij sporti.
Ish-mbrojtësi francez ka shprehur pakënaqësinë e tij për këtë situatë, duke theksuar se Ronaldo nuk është një lojtar i zakonshëm dhe se kontributi i tij për përfaqësuesen portugeze nuk mund të harrohet. Sipas Evra, ylli portugez ka qenë një figurë kyçe në historinë e futbollit të vendit të tij, duke udhëhequr një brez drejt sukseseve të mëdha dhe duke i dhënë Portugalisë një vëmendje të jashtëzakonshme në arenën ndërkombëtare.
“Jemi duke folur për Cristiano Ronaldon. Përpara se Jorge Jesus të bëhej dikush në Portugali, Ronaldo ishte tashmë aty. Ai ndihmoi në krijimin e historisë së futbollit portugez, udhëhoqi një brez drejt sukseseve të mëdha dhe i dha kombëtares një prani globale”, është shprehur Evra.
Francezi theksoi se Ronaldo nuk ka pse të jetë titullar në çdo ndeshje apo të luajë për 90 minuta, por stafi teknik duhet të gjejë një rol të përshtatshëm për të, duke shfrytëzuar përvojën, mentalitetin dhe ndikimin e tij te futbollistët e rinj.
“Po, Ronaldo është 41 vjeç, por nuk mund të hedhësh poshtë 25 vite histori. Nëse gjërat kanë arritur deri në pikën që ai të largohet nga grumbullimi, atëherë Jorge Jesus duhet të pyesë veten se si u lejuan të shkonin kaq larg”, ka theksuar ish-futbollisti.
Në përfundim, Evra nënvizoi se një lojtar mund të zëvendësohet në fushën e lojës, por historia dhe kontributi i Ronaldos për Portugalinë janë të pazëvendësueshme. Ai bëri thirrje për respekt ndaj kapitenit portugez, pavarësisht kritikave që mund të ketë për paraqitjet e tij.
“Mund të zëvendësosh një lojtar në fushë, por nuk mund të zëvendësosh historinë. Respektojeni Cristiano Ronaldon, edhe nëse nuk jeni dakord me të apo kritikoni paraqitjet e tij. Mos harroni kurrë atë që ai i ka dhënë Portugalisë”, ishte mesazhi i Evras.
