Mijëra protestues kanë dalë në rrugët e Spanjës për të kërkuar masa më të forta për mbrojtjen e qiramarrësve dhe përballimin e krizës së strehimit, pasi parlamenti rrëzoi dy dekretet e qeverisë për këtë çështje.
Protestat u zhvilluan në më shumë se 50 qytete, ndërsa një nga tubimet më të mëdha u mbajt në Madrid. Sipas autoriteteve, në kryeqytet morën pjesë rreth 70 mijë persona, ndërsa Sindikata e Qiramarrësve e vlerësoi pjesëmarrjen në rreth 500 mijë.
Protestuesit mbanin pankarta kundër rritjes së qirave dhe kërkonin masa më të forta për strehimin, ndërsa organizatorët kanë bërë thirrje edhe për një grevë të përgjithshme.
Në Valencia, protesta u shoqërua me përplasje mes demonstruesve dhe policisë. Sipas raportimeve, disa protestues hoqën barriera dhe hodhën objekte drejt efektivëve, ndërsa policia përdori plumba gome dhe gaz lotsjellës.
Një ditë më parë, parlamenti spanjoll rrëzoi dy dekretet e propozuara nga qeveria e Pedro Sánchez. Masat parashikonin, ndër të tjera, zgjatjen e mbrojtjes ndaj dëbimeve të personave vulnerabël deri në vitin 2030, si dhe rregulla të reja për qiratë afatshkurtra dhe qiratë e dhomave.
Dekretet u kundërshtuan në parlament nga Partia Popullore, Vox dhe Junts.
Zemërimi për krizën e strehimit u përshkallëzua pas dëbimit nga banesa të 87-vjeçares Maricarmen Abascal, e cila kishte jetuar aty për rreth 70 vjet. Rasti i saj është kthyer në një simbol të protestave për mbrojtje më të madhe të qiramarrësve