Vjosa Osmani presidente? Analisti Tafani: E pëlqyeshme nga diplomatët e huaj, por nuk frymëzon votuesit

I ftuar në “Review” me Greta Topjanën në Euronews, analisti Endri Tafani u shpreh skeptik për mundësinë e rizgjedhjes së Vjosa Osmanit në postin e presidentes së Kosovës. Tafani u ndal te profili i saj dhe te mbështetja që ajo mund të ketë në skenën politike.

“Mund të jesh mirë nga ana diplomatike, një figurë e pëlqyeshme nga diplomatët e huaj, por problemi është që nuk je politikane që frymëzon. Rezultatet e fundit të LDK-së nuk ishin të mira. Është punë e piruetave që bëhen. Një person që bën shumë pirueta politike, kalon sa këtej andej, nuk është se merr vota të njerëzve. Mund të jetë shumë i mirë për diplomaci, teknokrat, por kaq, se kur vjen puna te votat…”, u shpreh Tafani.

Analisti e lidhi gjithashtu situatën aktuale të Osmanit me raportin e saj politik me kryeministrin Albin Kurti. Sipas tij, Osmani i qëndroi besnike Kurtit për një periudhë, ndërsa më pas ndryshoi pozicion politik.

“Ajo i qëndroi besnike zotit Kurti dhe kur Kurti nuk ia vuri emrin, ndërroi barrikadë”, tha Tafani.