Dy persona janë proceduar penalisht pas rastit të gjashtë fëmijëve që përfunduan në spital me simptoma gastro-intestinale, pasi kishin konsumuar ushqim në një kopsht në Korçë.
Në hetim është një mjeke 57-vjeçare, e cila dyshohet se nuk ka njoftuar Policinë pas shfaqjes së problemeve shëndetësore te fëmijët.
Po ashtu, është proceduar penalisht edhe drejtoresha e kopshtit, me inicialet M.K., e cila dyshohet se nuk ka përmbushur detyrimet për kontrollin e ushqimit të shërbyer fëmijëve.
Gjashtë fëmijët u dërguan në Pediatrinë e Spitalit të Korçës pasi shfaqën simptoma gastro-intestinale. Sipas të dhënave paraprake, gjendja e tyre shëndetësore nuk paraqitet e rëndë.
Megjithatë, ende nuk është përcaktuar nëse problemet shëndetësore janë shkaktuar nga ushqimi i konsumuar në kopsht apo nga një infeksion tjetër.
Autoritetet kanë marrë mostrat përkatëse dhe analizat pritet të përcaktojnë shkakun e saktë të situatës.