Krista Pike nuk ishte e vetmja, 5 raste ekzekutimesh me vdekje dështuan, dorëhiqet drejtori i burgjeve i shtetit USA

Kreu i burgjeve në shtetin amerikan të Tennessee do të largohet nga detyra pas dështimit për të ekzekutuar të dënuarën me vdekje Christa Pike, njoftoi të shtunën guvernatori i shtetit, Bill Lee.

Frank Strada, komisioneri i Departamentit të Korrigjimit, do të largohet nga posti më vonë gjatë muajit tetor, ndërsa shteti nis një hetim të pavarur për atë që shkoi keq gjatë ekzekutimit të Pike të mërkurën.

Strada deklaroi se dorëheqja e tij do t'i mundësojë hetimit të vijojë në interesin më të mirë të Tennessee.

“Të shërbeja si komisioner  ishte një nder i madh dhe vazhdoj të besoj se departamenti i përmbushi përgjegjësitë e tij në përputhje me protokollin e përcaktuar”, tha Strada në deklaratën e dorëheqjes.

“Megjithatë, largimi im nga detyra është në interesin më të mirë të banorëve të Tennessee, ndërsa hetimi i pavarur vijon”, shtoi ai. “Besoj se ky hetim është plotësisht i përshtatshëm dhe i nevojshëm dhe mezi pres të bëj gjithçka që mundem për të ndihmuar në përcaktimin e saktë të asaj që ndodhi.”

Strada dha dorëheqjen në një kohë kur po shtohej vëmendja ndaj procedurave të ekzekutimeve në Tennessee, të cilat mbahen nën masa të rrepta konfidencialiteti. Të mërkurën, Pike iu injektuan barna vdekjeprurëse, por ajo mbijetoi. Ajo u bë e dënuara e parë me vdekje në SHBA që i nënshtrohet një tentative të tillë ekzekutimi dhe mbijeton.

Avokati i Pike, Randy Spivey, i cili e ndoqi procedurën nga brenda dhomës së ekzekutimit, e përshkroi atë që ndodhi si “mizore dhe torturuese”. Ai tha se numëroi personalisht shtatë gjilpëra të injektuara në krahun e majtë të Pike, “njëra prej të cilave dukej e përkulur kur u nxor”.

Avokatët kanë pretenduar se injeksioni vdekjeprurës i dështuar i Pike ishte ekzekutimi i pestë “i dështuar” i kryer nën drejtimin e Stradës në dy shtete që nga viti 2022, sipas raportimeve të Guardian të shtunën, disa orë para njoftimit për dorëheqjen e tij.

Sipas një dokumenti të paraqitur në gjykatë nga avokatët e saj, Pike mbeti pa ndjenja dhe nën asistencë respiratore në një spital të premten. Avokatët e saj thanë se personeli mjekësor po përpiqej t'i shpëtonte jetën dhe, deri të enjten në mbrëmje, po punonte për të eliminuar nga organizmi i saj dy dozat e barit të përdorur për ekzekutimin.

Dështimi i pazakontë i së mërkurës në dhomën e ekzekutimit në Tennessee ka shkaktuar kërkesa për shpjegime nga persona në të dyja anët e debatit për dënimin me vdekje. Përveç urdhërimit të hetimit të pavarur për rastin, Lee ka pezulluar përkohësisht planifikimin e ekzekutimeve në Tennessee.

Avokatët e Pike thanë se besojnë se komplikacionet me linjat intravenoze bënë që pentobarbitali të hynte në trupin e saj dhe jo në gjak.

“Dorëheqja e Frank Stradës nuk e ndryshon faktin se Tennessee po i mban ekzekutimet e tij të mbuluara me sekret”, tha Kit Thomas, avokat i të dënuarve me vdekje.

Ai shtoi se, kur guvernatori Lee e punësoi Stradën për të zgjidhur problemet me ekzekutimet në Tennessee dhe  historia e tij problematike me ekzekutimet në Arizona ishte e njohur.

Pike, 50 vjeçe, u dënua me vdekje për vrasjen në vitin 1995 të shoqes së saj të klasës, 18-vjeçares Colleen Slemmer. Pike dhe i dashuri i saj i atëhershëm, Tadaryl Shipp, vranë Slemmer në një kamp trajnimi pune në Knoxville.

Në gjoksin e Slemmer ishte gdhendur një pentagram.

Pas vrasjes, sipas avokatëve të saj, Pike u diagnostikua me çrregullim bipolar dhe çrregullim të stresit post-traumatik.

“Mu deshën shumë vite për të kuptuar peshën e asaj që kisha bërë”, kishte deklaruar Pike në një kërkesë të mëparshme për falje. “Edhe më shumë kohë për të pranuar se sa jetë kisha prekur. I mora jetën fëmijës, motrës dhe shoqes së dikujt. Tani më sëmur mendimi se isha e aftë të kryeja një krim të tillë.”

Nëse ekzekutimi i saj do të kishte përfunduar me sukses atë ditë, Pike do të ishte bërë të mërkurën gruaja e parë e ekzekutuar në Tennessee pas më shumë se 200 vitesh.