Ukraina po përgatitet për një dimër të vështirë, ndërsa autoritetet në Kiev paralajmërojnë se Rusia po zgjeron sulmet nga infrastruktura energjetike drejt urave, rrugëve dhe objekteve civile.
Sipas raportimit të cituar të Reuters, presidenti Volodymyr Zelensky deklaroi se inteligjenca ukrainase disponon dokumente që tregojnë një ndryshim në strategjinë ruse.
Ai pretendon se synimi është të vështirësohet funksionimi i qyteteve dhe të detyrohen banorët të largohen.
“Kemi parë dokumente dhe e dimë se ato i lejojnë ata të sulmojnë infrastrukturën, logjistikën, rrugët, shkollat dhe spitalet, për të detyruar njerëzit të largohen nga kryeqyteti dhe qytete të ndryshme”, tha Zelensky.
Në qendër të shqetësimit janë goditjet ndaj urave të Kievit. Sipas kryebashkiakut Vitali Klitschko, Ura Veriore mbi lumin Dniepër pësoi dëmtime në rrugë dhe në kabllot e trolejbusëve, duke shkaktuar ndërprerjen e trafikut.
Nuk u raportuan të lënduar. Sulmi pasoi goditjet ndaj Urës Jugore, të cilat kishin sjellë mbyllje të përkohshme dhe bllokime të mëdha në qarkullim.
Urat janë jetike për kryeqytetin ukrainas, pasi lidhin dy brigjet e Dnieprit.
Ndërprerja e tyre prek lëvizjen e banorëve, furnizimet dhe shërbimet e emergjencës, duke shtuar presionin mbi qytetin me afro tre milionë banorë.
Kievi druhet se sulmet ndaj transportit, të kombinuara me goditjet në rrjetin energjetik, mund të shkaktojnë probleme të rënda me energjinë, ngrohjen dhe ujin gjatë dimrit. Autoritetet ukrainase paralajmërojnë gjithashtu për mungesa në sistemet dhe municionet e mbrojtjes ajrore.
Ndërkohë, Ministria e Jashtme ruse u ka bërë thirrje shtetasve të huaj dhe diplomatëve të largohen nga Kievi, duke paralajmëruar vijimin e sulmeve. Moska i përshkruan ato si kundërpërgjigje ndaj goditjeve ukrainase dhe mohon se shënjestron qëllimisht civilët.
Ukraina, nga ana tjetër, po vijon sulmet ndaj rafinerive dhe objekteve energjetike ruse, me synimin për të rritur koston ekonomike të luftës për Moskën.
Përshkallëzimi po prek edhe portet dhe transportin në Detin e Zi, duke e kthyer infrastrukturën energjetike dhe logjistike në një nga frontet kryesore të konfliktit./Versus.al
