Një diskutim mbi divorcin dhe mënyrën se si shoqëria i percepton gratë e divorcuara në emisionin “Goca dhe Gra” u shoqërua edhe me një rrëfim personal nga Selin Bollati.
Ajo foli për një periudhë të vështirë në marrëdhënien e prindërve të saj, e cila, sipas saj, nisi pas vendimit të saj për të marrë pjesë në “Big Brother”. Selin tregoi se zgjedhja e saj ishte mbështetur nga të dy prindërit, por në përfundim të eksperiencës, qëndrimet e tyre ndaj vendimit të saj ishin të ndryshme dhe kjo solli një konflikt mes tyre.
“Unë e kam të përjetuar për veten time. Një vendimmarrje që unë bëra për në ‘Big Brother’, njëri prind e suportonte, njëri prind nuk e suportonte dhe askush nuk u drejtua tek unë që të më pyeste pse ti ke marrë këtë vendimmarrje me pëlqimin e njërës palë dhe mospëlqimin e palës tjetër, por ama kaloi në konflikt të brendshëm mes njëri-tjetrit”, tregoi Selin Bollati.
“E ke për ‘Big Brother’-in?”, e pyeti Ori Nebijaj.
“Po, rasti i ‘Big Brother’-it. Ishte një vendimmarrje që unë e mora me konfirmimin e të dyja palëve, e të dy prindërve. Por në përfundim të tij nuk ishte një rrugëtim që për njërën palë u përqafua, për palën tjetër ishte thjesht dëshira që unë të sfidoja veten dhe ma dha atë lirinë për ta çuar deri në fund”, u përgjigj Selina.
Sipas saj, tensionet mes prindërve nuk përfunduan me mbylljen e eksperiencës televizive. Përkundrazi, situata vijoi të përkeqësohej dhe Selin tha se në një moment e kishte parë veten si faktor në krizën që po kalonte marrëdhënia e tyre.
“Me të mbaruar si eksperiencë, një krisje që vazhdoi edhe pas daljes time ishte për shkakun tim. Pra, unë isha faktori që prindërit e mi në një pikë po pësonin një krisje tepër serioze në marrëdhënie. Unë e kam ndarë shpesh dhe me miqtë e mi kur situata ishte ndezur”, rrëfeu ajo.
Kjo situatë e bëri Selin të reflektonte edhe mbi divorcin dhe ndikimin që mund të ketë një fëmijë në marrëdhënien mes dy prindërve. Ajo tha se kishte menduar se një fëmijë mund të jetë në disa raste faktor që çon një çift drejt ndarjes, por edhe se mund të shërbejë si forcë për t’i afruar sërish prindërit.
“Aty kam stopuar në një moment dhe kam thënë: OK, të tilla marrëdhënie në një moment, edhe divorci paska një anë tjetër të një medaljeje, që qenka që shpesh mund të jetë fëmija faktori që mund t’i çojë prindërit në ndarje, por, prapë nga rasti im, në rastin tim po bazohem, mund të jetë prapë fuqia e fëmijës për t’i bërë prapë bashkë.”
E pyetur nga Orinda Huta se çfarë po ndodhte aktualisht në familjen e saj, Selin zbuloi se prindërit e saj janë bashkë dhe se ajo kishte ndërhyrë për të ndihmuar në përmirësimin e marrëdhënies së tyre.
“Në këtë moment prindërit janë bashkë. Unë e kam ndarë dhe më përpara me publikun dhe kjo ka qenë prej negociimeve që unë kam bërë, pra unë e kuptova që problemi isha unë dhe thashë OK”, tha Selina.
E pyetur nëse kjo situatë kishte qenë një barrë për të, Selin e cilësoi si një përgjegjësi të rëndë emocionale, duke theksuar se asnjë fëmijë nuk dëshiron të shohë njërin prej prindërve në një situatë të keqe.
“Është përgjegjësi, se nuk ka fëmijë që asnjërën palë do ta shikojë keq”, u shpreh Selin Bollati.