Flamuri shqiptar është rikthyer në majën e Korabit, pasi më herët ishte hequr nga vendi ku ishte vendosur dhe ishte zëvendësuar me flamurin e Maqedonisë së Veriut.
Maja e Korabit, e cila arrin një lartësi prej 2764 metrash, ndodhet në kufirin mes Shqipërisë dhe Maqedonisë së Veriut dhe është një nga pikat më të larta të rajonit.
Rikthimi i flamurit kuqezi është bërë nga një grup studentësh shqiptarë nga Shkupi dhe Tetova, në bashkëpunim me patriotë dibranë nga Maqellara. Lajmi është bërë i ditur përmes një njoftimi të publikuar nga ish-deputeti i Partisë Demokratike, Azgan Haklaj.
Ngjarja vjen pas një sërë zhvillimesh lidhur me simbolet e vendosura në majën e Korabit. Në fund të shtatorit, në rrjetet sociale u publikuan pamje ku në vendin ku më parë ishte vendosur flamuri shqiptar shfaqej flamuri i Maqedonisë së Veriut. Zëvendësimi i simboleve u raportua edhe nga mediat e Maqedonisë së Veriut.
Pas publikimit të pamjeve, Federata Shqiptare e Alpinizmit dhe Turizmit Malor kërkoi verifikimin e rastit dhe identifikimin e personave përgjegjës për heqjen e simbolit shqiptar.
Tashmë, pas rikthimit të flamurit kuqezi në majë, situata ka marrë një tjetër zhvillim, ndërsa mbetet për t’u verifikuar nëse autoritetet do të ndërmarrin hapa për të sqaruar rrethanat e zëvendësimit të mëparshëm të flamujve.