Polici sapo kishte mbyllur shërbimin, si ndodhi aksidenti tragjik në Korçë

Detaje të reja janë bërë publike nga Policia për aksidentin tragjik të ndodhur mëngjesin e sotëm në aksin rrugor “Korçë-Pogradec”, në afërsi të fshatit Bulgarec, ku humbi jetën një 60-vjeçar.

Ngjarja u regjistrua rreth orës 07:10, kur automjeti i drejtuar nga një 30-vjeçar, punonjës policie jashtë shërbimit, u përplas me një biçikletë që drejtohej nga shtetasi R. A., rreth 60 vjeç.

Sipas informacionit paraprak të Policisë, përplasja ka qenë fatale për drejtuesin e biçikletës, i cili ka humbur jetën në vendngjarje.

Në momentin e aksidentit, drejtuesi i automjetit, punonjësi i policisë D. M., nuk ishte në shërbim. Pas përplasjes, ai ka mbetur i plagosur dhe është transportuar në spital, ku ndodhet në gjendje të rëndë shëndetësore.

Për zbardhjen e plotë të dinamikës së aksidentit kanë nisur hetimet. Në vendngjarje ndodhen grupi hetimor dhe efektivë të Agjencisë së Mbikëqyrjes Policore (AMP), nën drejtimin e Prokurorisë.

Autoritetet po kryejnë veprimet hetimore për të përcaktuar rrethanat e përplasjes, ndërsa pritet që ekspertiza dhe veprimet e tjera procedurale të hedhin më shumë dritë mbi shkaqet e aksidentit.