Diaspora shqiptare do të zhvillojë sot, më 4 tetor, një protestë në Berlin kundër aktgjykimit të Gjykatës Speciale ndaj ish-krerëve të Ushtrisë Çlirimtare të Kosovës (UÇK). Protesta do të mbahet me moton “Jo në emrin tim”, përpara Parlamentit gjerman.
Sipas njoftimit të organizatorëve, tubimi nis në orën 12:00, pranë ndërtesës së Reichstagut, në adresën Platz der Republik 1, në Berlin.
Protesta të diasporës kundër aktgjykimit të Hagës është zhvilluar një ditë më parë edhe në Mynih të Gjermanisë.
Ndërkohë, sot vijon edhe protesta e 19-të në Prishtinë, e cila do të mbahet në sheshin “Skënderbeu”, duke nisur nga ora 19:00. Edhe kjo protestë mban moton “Jo në emrin tim” dhe, krahas kundërshtimit të aktgjykimit, kërkon edhe miratimin nga Kuvendi i Kosovës të Projektligjit për ndryshimin e Ligjit për Dhomat e Specializuara.
Më 16 shtator, Dhomat e Specializuara në Hagë shpallën aktgjykimin në shkallën e parë ndaj ish-krerëve të UÇK-së. Hashim Thaçi, Jakup Krasniqi, Kadri Veseli dhe Rexhep Selimi u dënuan në total me 81 vjet burgim.
Aktgjykimi nuk është përfundimtar dhe palët kanë të drejtë të apelojnë vendimin.
#Kosovë #Hagë #UÇK #HashimThaçi #KadriVeseli #JakupKrasniqi #RexhepSelimi #Berlin #JoNëEmrinTim #Protestë