PD: Të ndryshojë sistemi elektoral. Bylykbashi: Lista 100 % të hapura, edhe kryebashkiakët të zgjidhen me dy raunde
Partia Demokratike do të kërkojë në Komisionin e Reformës Zgjedhore ndryshimin e sistemit elektoral për zgjedhjet parlamentare, por edhe për zgjedhjet lokale.
Bashkëkryetari i Komisionit të Posaçëm për Reformën Zgjedhore, Oerd Bylykbashi, në një intervistë për Vizion Plus, thekson se opozita mbështet sistemin proporcional kombëtar me lista 100% të hapura.
Por ai vetë mbështet idenë që listat e hapura plotësisht të jenë edhe për këshillat bashkiakë në zgjedhjet lokale që do të mbahen në pranverën e vitit 2027.
“Unë vetë do të çoj përpara idenë e hapjes së listave 100% për sa i përket këshillave vendorë. Sigurisht e komplikon procesin e KQZ-së, por rrit demokracinë në raport me mundësinë e zgjedhësve për të votuar”, tha bashkëkryetar i komisionit të Reformës Zgjedhore, Oerd Bylykbashi.
Bylykbashi propozon që edhe zgjedhja e kryetarëve të bashkive të bëhet me dy raunde, një sistem që Shqipëria e ka pasur deri në vitin 2003.
“Një kryetar bashkie nuk duhet të jetë thjesht i forcës politike, duhet të jetë i qytetarëve. Dhe një kryetar bashkie që zgjidhet me një shumicë të thjeshtë, 20%, 30% të votave, sepse vota fragmentohet, nuk përfaqëson vullnetin e shumicës së qytetarëve që kërkojnë zgjidhjen e halleve të tyre.”
Por, përtej sistemit, prioritet i reformës zgjedhore për PD-në mbetet ndarja e shtetit nga zgjedhjet. Ndaj, 11 muaj pas ngritjes së Komisionit të Posaçëm të Reformës Zgjedhore, Partia Demokratike ka vendosur të çojë në komision propozimet e saj për ndarjen e shtetit nga zgjedhjet dhe kjo do të jetë prova e parë nëse do të ketë apo jo reformë konsensuale.
“Çdo sistem do të dështonte nëse shteti nuk do të ndahet nga partia në pushtet. Shteti do të pushtonte zgjedhjet dhe do të shpartallonte standardin e zgjedhjeve.”
E ndërsa Komisioni i Përbashkët i Reformës Territoriale dështoi dhe PS-ja po miraton hartën e saj territoriale pa konsensusin e opozitës, Bylykbashi paralajmëron se reforma zgjedhore rrezikohet nga i njëjti fat
/vizionplus.tv
