Prej më shumë se 30 vitesh, bojlerët e vendosur mbi tarracat e pallateve në Vlorë vijojnë të jenë një problem për banorët, ndërsa instalimet e shumta ndër vite kanë shkaktuar dëmtime në strukturat e ndërtesave.
Sipas banorëve, vendosja e bojlerëve dhe ndërhyrjet e vazhdueshme në tarraca kanë sjellë dëmtime në tarraca dhe soleta. Në disa raste, lagështia ka depërtuar deri në apartamentet e kateve të larta, duke shkaktuar dëmtime të mëtejshme dhe amortizim të ndërtesave.
Një nga zonat ku shqetësimi është më i theksuar është lagjja “Isa Boletini”, e cila aktualisht po i nënshtrohet rikonstruksionit nga Bashkia e Vlorës.
Në këtë kuadër, banorët kërkojnë që krahas rikonstruksionit dhe sistemimit të fasadave të pallateve, të ndërhyhet edhe për largimin e bojlerëve nga tarracat. Sipas tyre, pajisjet mund të zhvendosen në hapësira të përshtatshme në katet e para të pallateve, duke shmangur dëmtimet e mëtejshme të tarracave dhe depërtimin e lagështisë në banesa.
Banorët shpresojnë që problemi i trashëguar prej dekadash të marrë zgjidhje gjatë punimeve të rikonstruksionit, në mënyrë që tarracat dhe strukturat e pallateve të mos vijojnë të dëmtohen nga instalimet e bojlerëve.
#Vlorë #IsaBoletini #Bojlerët #Pallatet #Rikonstruksion #BashkiaVlorë #Banorët