Lojtarët bojkotuan ndeshjen, Lautaro futet në histori

Argjentina ka fituar 7-0 ndaj Burkina Fasos në miqësoren e zhvilluar në stadiumin Monumental të Buenos Airesit.

Ndeshja nisi me gol shumë shpejt. Në minutën e 4-t, Lautaro Martinez ekzekutoi një penallti, por portieri i Burkina Fasos e priti goditjen. Sulmuesi i Interit reagoi menjëherë pas pritjes dhe e dërgoi topin në rrjetë, duke i dhënë Argjentinës avantazhin 1-0.

Ky ishte goli i dytë radhazi për Lautaron me kombëtaren, pas realizimit në fitoren 4-0 ndaj Bolivisë. Me golin ndaj Burkina Fasos, sulmuesi arriti në kuotën 42 me Argjentinën dhe barazoi Serxho Agueron në vendin e tretë të golashënuesve më të mirë në historinë e kombëtares.

Në krye të kësaj renditjeje qëndron Lionel Mesi me 125 gola. Pas tij, në objektivin e Lautaros është Gabriel Batistuta, i cili ka 54 gola me Argjentinën. Sulmuesi i Interit është 12 gola larg Batistutës dhe 83 gola pas Mesit në këtë statistikë.

Pas golit të Lautaros, Argjentina vazhdoi të kontrollonte ndeshjen. Avantazhi u dyfishua pas një autogoli të mbrojtësit Dialo, ndërsa më pas Lautaro u përfshi sërish në aksionin e golit të tretë, duke asistuar Prestianin.

Argjentina vazhdoi të sulmonte dhe para përfundimit të pjesës së parë realizoi edhe dy gola të tjerë. Niko Paz dhe Alvarez shënuan për të çuar rezultatin në 5-0.

Në pjesën e dytë ritmi i ndeshjes ra për shkak edhe të zëvendësimeve të shumta, por Argjentina vazhdoi të kishte kontrollin e lojës. Mastantuono realizoi golin e gjashtë pas një aksioni të ndërtuar nga skuadra, ndërsa në kohën shtesë Simeone shënoi me kokë për rezultatin përfundimtar 7-0.

Përballë Argjentinës, Burkina Faso u paraqit me një formacion të përbërë pothuajse tërësisht nga lojtarë të ekipit U-23. Vendimi erdhi pas bojkotimit të lojtarëve kryesorë, të cilët kishin kundërshtime për menaxhimin e pagesave dhe për mënyrën e organizimit të udhëtimit drejt Amerikës së Jugut.

Skuadra e Burkina Fasos kishte udhëtuar për rreth 12 orë dhe kishte mbërritur në qytet vetëm pesë orë para fillimit të ndeshjes. Kjo situatë ndikoi në përbërjen e ekipit që u përball me Argjentinën, e cila e shfrytëzoi diferencën në nivel dhe e kontrolloi takimin nga fillimi deri në fund.