Kryeministri i Spanjës, Pedro Sánchez, ka vendosur të shpallë zgjedhje të përgjithshme të parakohshme për datën 29 nëntor, pasi Kongresi hodhi poshtë dy dekrete për strehimin të propozuara nga qeveria e tij.
Dhoma e ulët e parlamentit votoi kundër dy dekreteve-ligj të premten, duke rrëzuar kështu masat që qeveria kishte hartuar si përgjigje ndaj krizës së strehimit.
Ato dështuan pavarësisht negociatave të minutës së fundit për të siguruar mbështetjen e nevojshme.
Pas këtij dështimi, Sánchez mori pak kohë për të reflektuar, duke zhvilluar bisedime gjatë fundjavës me ministra dhe figura të larta të Partisë së tij Socialiste (PSOE) për të vlerësuar nëse duhej ta çonte deri në fund mandatin parlamentar apo t’i dërgonte votuesit në zgjedhje.
Ky njoftim pason disa muaj veçanërisht të vështirë për qeverinë e koalicionit, të karakterizuar nga vështirësitë për të siguruar mbështetje në Kongres, çështje gjyqësore që përfshinin figura të afërta me PSOE-në dhe një krizë të rëndë migracioni në Ceuta.
Partia konservatore Popullore (PP) dhe partia e ekstremit të djathtë Vox e kanë akuzuar qeverinë se ka reaguar me vonesë dhe kanë vënë në dyshim politikën e saj ndaj Marokut, ndërsa Sánchez ka mbrojtur veprimet e forcave të sigurisë dhe reagimin e qeverisë së tij.
Krahas situatës në Ceuta, kanë dalë në pah disa çështje korrupsioni dhe procedura të tjera ligjore që përfshijnë persona nga rrethi politik i kryeministrit, të cilat opozita i ka shfrytëzuar për të shtuar presionin ndaj qeverisë.
Gjithashtu, brishtësia e shumicës parlamentare është bërë gjithnjë e më e dukshme. Qeveria është dashur të negociojë një pjesë të madhe të agjendës së saj votë për votë me partnerët dhe ka pësuar disa humbje në Kongres.
