Pas daljes nga ambientet e SPAK, Sali Berisha ka hedhur akuza të forta ndaj Prokurorisë së Posaçme, duke e lidhur qëndrimin e saj me ndryshimet e fundit ligjore të miratuara nga mazhoranca.
Berisha pretendoi se SPAK nuk ka reaguar ndaj ndryshimeve që, sipas tij, dëmtojnë procesin e hetimit dhe akuzës. Ai e akuzoi institucionin se është i lidhur me Partinë Socialiste dhe me kryeministrin Edi Rama.
“SPAK heshti si fija e barit kur Rama votoi ligjin që i jep goditje fatale hetimit”, deklaroi Berisha.
Kreu i PD-së tha gjithashtu se gjatë qëndrimit në SPAK kishte parë, sipas tij, punonjësit duke përgatitur valixhe dhe dosje, duke pretenduar se në korridore dëgjoheshin thirrje në mbështetje të Partisë Socialiste.
Një pjesë të deklaratës së tij ai ia kushtoi edhe Këshillit të Evropës. Berisha tha se nga Strasburgu ishte informuar se institucioni nuk ka dhënë miratim për ndryshimet e miratuara në Shqipëri dhe se këtë qëndrim ia kishte bërë të qartë edhe kryeministrit Rama.
Sipas Berishës, heshtja e SPAK-ut përbën një tregues të një marrëveshjeje me mazhorancën.
“Çfarë nënkupton heshtja e tyre? Heshtja e tyre nënkupton se këta janë pjesë e komplotit që i bëhet këtij vendi për të shkatërruar hetuesinë”, u shpreh ai.
Berisha kritikoi edhe dispozitat që, sipas tij, prekin mënyrën e administrimit të provave dhe rolin e gjykatës në procesin penal. Ai pretendoi se ndryshimet mund të ndikojnë drejtpërdrejt në hetimet e SPAK-ut.
Në përfundim, kreu i PD-së e përsëriti akuzën e tij se SPAK është “një seksion i PS-së” dhe vuri në pikëpyetje pavarësinë e institucionit të akuzës.
