Ndryshimet në Kodin e Procedurës Penale rikthejnë censurën e diktaturës

Kreu i Partisë Demokrati Sali Berisha ka folur për Ndryshimet në Kodin e Procedurës Penale të prezantuara nga kryeministri Edi Rama dhe ministri Toni Gogu.

Berisha është shprehur se gjatë vizitës së tij në Strasburg është informuar se Këshilli i Europës nuk është dakord me asnjë nga ndryshimet e bëra nga Rama dhe nuk ka dhënë asnjë miratim për këto ndryshime.

“Me ligjin që kreu i tyre, Edi Rama votoi në parlament, i jep një goditje fatale hetimit, procesit të hetimit dhe procesit të akuzës.

Organi i parë që duhej të reagonte është ky organ, i cili ndaj një ligji të tillë në mënyrën më të turpshme heshti si fija e barit.

Ndërkohë, unë u informova nga Strasburgu se Këshilli i Evropës nuk është absolutisht dakord në asnjë nga ndryshimet e bëra nga Edi Rama. Nuk ka dhënë asnjë miratim për këto ndryshime dhe këtë ia ka bërë të qartë Edi Ramës”, tha Berisha.

Sipas Berishës ky ligj përjashton mediat nga misioni i tyre i informimit të publikut dhe rikthen censurën e diktaturës.

“Çfarë nënkupton heshtja e tyre?

Heshtja e tyre nënkupton se këta janë pjesë e komplotit që i bëhet këtij vendi për të shkatërruar hetuesinë tani që në skenë erdhi Edi Rama me hajdutët e tij.

Pra, heshtja e tyre tregon se kemi të bëjmë me një marrëveshje midis tyre dhe Edi Ramës, unë gjithnjë u kam deklaruar ju se ky është një seksion i shpifur i PS.

Se këta janë njerëz pa ligj dhe moral.

A mundet institucioni qendror i akuzës, siç është SPAK-u për zyrtarët, të heshtë para ligjit, i cili paralizon hetimin?

A mundet një institucioni i drejtësisë të heshtë para ligjit që rikthen censurën e diktaturës?

Që përjashton mediat nga misioni i tyre i informimit të publikut.

A mundet një institucion i vërtetë i akuzës të heshtë para faktit se do të detyrohet t’ia çojë provat për të miratuar gjykatësi, pa bërë gjykimin, që e shndërron gjykatësin në hetues në një akt të pashembullt?

Dhe këta heshtin si fija e barit, si hija e turpit dhe tregojnë se çfarë mercenarësh janë”, u shpreh Berisha./ CNA