Me 91 vota pro, Kuvendi i Kosovës miraton projektligjin për Dhomat e Specializuara

Kuvendi i Kosovës ka miratuar në lexim të parë projektligjin e propozuar nga Partia Demokratike e Kosovës për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.

Projektligji u miratua me 91 vota pro, asnjë kundër dhe asnjë abstenim.

Nisma e PDK-së kishte kaluar më herët në Komisionin për Legjislacion, i cili e kishte përkrahur në parim projektligjin me votë unanime.

Ndryshimet e propozuara lidhen me Ligjin për Dhomat e Specializuara dhe Zyrën e Prokurorit të Specializuar në Hagë.

Pas miratimit në lexim të parë, projektligji kalon për shqyrtim në komisionet përkatëse. Komisionet e shqyrtojnë atë nen për nen, mund të propozojnë amendamente dhe përgatisin raportin me rekomandime për Kuvendin.

Në leximin e dytë, projektligji rikthehet në seancë plenare së bashku me amendamentet dhe raportin e komisionit. Në këtë fazë bëhet shqyrtimi i detajuar dhe votohet për miratimin e projektligjit.

Sipas Rregullores së Kuvendit, në leximin e dytë nuk mund të propozohen amendamente të reja në seancë.

Projektligji u dorëzua nga PDK-ja pak ditë pas aktgjykimit të Dhomave të Specializuara në Hagë ndaj ish-krerëve të Ushtrisë Çlirimtare të Kosovës.

Më 16 shtator, Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet, për krime lufte. Të katër u shpallën të pafajshëm për krime kundër njerëzimit. Ekipet mbrojtëse kanë paralajmëruar se do ta apelojnë verdiktin për akuzat për krime lufte.