E jashtëzakonshme! Yamal bëhet i pari në histori me këtë rekord
Lamine Yamal vazhdon të mahnisë me fanellën e Spanjës, duke vendosur një rekord të veçantë në futbollin ndërkombëtar.
Ylli i Barcelonës është bërë lojtari i parë që shënon në tre ndeshje radhazi të kombëtares, me të tre golat të realizuar brenda 10 minutave të para.
Serinë e tij e nisi ndaj Anglisë, ku shënoi në minutën e dytë, përpara se të përsëriste të njëjtën gjë ndaj Kroacisë, sërish në minutën e dytë.
Në sfidën e fundit ndaj Çekisë, Yamal priti deri në minutën e gjashtë për të tundur rrjetën dhe për t’i dhënë Spanjës avantazhin.
Goli ndaj Çekisë ishte një tjetër perlë e talentit 19-vjeçar, i cili goditi bukur nga jashtë zonës dhe e dërgoi topin në trekëndësh. Spanja në fund triumfoi 3-1, duke ruajtur ecurinë perfekte në grup.
Yamal po tregon kështu se është kthyer në një nga protagonistët kryesorë të “La Roja”, ndërsa statistika e tij e fundit e bën edhe më të veçantë fillimin e ndeshjeve me kombëtaren.
