Vodhën 2 700 mace, arrestohen 12 persona në Vietnam

Dymbëdhjetë burra janë arrestuar në Vietnam, nën akuzën se kanë vjedhur rreth 2 700 mace për mish, duke i marrë nga zonat e banuara gjatë natës, njoftuan policia dhe mediat shtetërore.

Sipas policisë, të arrestuarit kanë pranuar se kishin “vjedhur dhe trafikuar rreth 2 700 mace të racave të ndryshme”.

Grupi vepronte mes orës 23:00 dhe 04:00 të mëngjesit. Ata udhëtonin me motoçikleta në grupe të vogla dhe hynin në zona të banuara për të vjedhur macet e banorëve.

Policia sekuestroi në qytetin Ho Chi Minh, në jug të Vietnamit, 50 mace të gjalla, 55 kurthe, dy peshore dhe dy makina për heqjen e lëkurës.

Rrjeti ishte vënë në shënjestër të policisë që prej muajit korrik.

Në Vietnam, konsumimi i mishit të qenve dhe maceve është i ligjshëm, por shitësit duhet të kenë certifikata që vërtetojnë origjinën e kafshëve.

Sipas raportimeve të mediave, macet e vjedhura mund të shiten në restorante për të paktën 2.4 euro për kilogram.

Më herët gjatë këtij viti, 18 persona u arrestuan në qytetin Ho Chi Minh, të dyshuar për përfshirje në dy rrjete të ndryshme të vjedhjes së maceve.