Pas reagimit të parë publik, ku kërkoi falje dhe iu drejtua veçanërisht Klaudias, bashkëshortes së kompozitorit Adrian Hila, dhe vajzave të saj, këngëtarja Blerina Matraku ka reaguar sërish përmes rrjeteve sociale. Këtë herë, mesazhi i saj është dukshëm më i drejtpërdrejtë dhe i drejtohet vetë Hilës, ndërsa ajo flet për pasojat që publikimi i materialeve intime, sipas saj, ka sjellë në jetën personale, familjare dhe profesionale. Në reagimin e parë, Matraku kishte zgjedhur të kërkonte falje publike. Ajo u shpreh se nuk dëshironte të justifikohej, por të merrte përgjegjësinë për veprimet e saj, ndërsa njëkohësisht kërkoi që videot intime të mos vazhdonin të shpërndaheshin. Sipas saj, besimi që kishte dhënë në një moment vulnerabël të jetës së saj ishte përdorur në mënyra që ajo thotë se ende nuk i di. Por vetëm pak kohë më pas, tonet e reagimit kanë ndryshuar. Në një seri postimesh, këngëtarja ka folur për atë që e konsideron si dëmin më të madh që i është shkaktuar: jo vetëm ekspozimin e jetës së saj private, por edhe pasojat që, sipas saj, kjo histori ka sjellë te familja dhe marrëdhëniet e saj me njerëzit më të afërt. “Të bësh një vajzë që të mos e shohë dot babain e saj në sy, ta bësh atë të ikë nga shtëpia dhe të humbë të vetmen gjë që ka mbetur në jetë, dinjitetin, ky është KRIM”, shkruan Matraku në reagimin e saj.