Ilir Panda zgjidhet kryetar i ri i Gjykatës së Lartë

Ilir Panda është zgjedhur kryetar i ri i Gjykatës së Lartë. Mbledhja e gjyqtarëve të Gjykatës së Lartë ka votuar unanimisht pro kandidaturës së Pandës, i cili ishte kandidati i vetëm në garë.

Në votim morën pjesë 14 gjyqtarë, të cilët votuan njëzëri pro Pandës. Ai do të drejtojë Gjykatën e Lartë për tre vitet e ardhshme, duke nisur detyrën më 19 tetor.

Panda pason në këtë detyrë Sokol Sadushin në krye të Gjykatës së Lartë.

Ilir Panda është diplomuar jurist në Fakultetin e Drejtësisë të Universitetit të Tiranës në vitin 1986. Ai ka kryer gjithashtu disa kualifikime pasuniversitare të organizuara nga institucione shqiptare, evropiane dhe të Shteteve të Bashkuara të Amerikës.