Reforma Territoriale/ Komisioni i Ligjeve miraton projektligjin mes përplasjeve dhe debateve me Opozitën. Të enjten kalon në Kuvend

Foto ilustruse

TIRANA- Komisioni i Ligjeve ka miratuar ditën e sotme dhe ka kaluar për votim në seancë plenare projektligjin për Reformën Territoriale. Kjo është miratuar me 8 votat e deputetëve të Partisë Socialiste, ndërsa ky projektligj synon të ulë numrin e bashkive në vend nga 61 në 46.

Asnjë nga deputetët socialistë në Komisionin e Ligjeve nuk ka votuar kundër apo abstenuar ligjin, ndërsa projektligji do të votohet në Kuvend më datë 8 tetor. Mbledhja e Komisionit të Ligjeve gjatë diskutimeve për Reformën Territoriale është zhvilluar pa prezencën e deputetëve të opozitës. 

Drafti i reformës administrative-territoriale do të kalojë për votim në seancën plenare të së enjtes, më 8 tetor. Pas kësaj ajo pritet të votohet nga deputetët.

Sipas projektligjit të propozuar nga Partia Socialiste, 15 bashkitë që synohet të shkrihen janë:

-Fushë-Arrëzi → bashkohet me Pukën

-Klosi → bashkohet me Matin

-Rrogozhina → bashkohet me Kavajën

-Dimali → bashkohet me Beratin

-Poliçani → bashkohet me Beratin

-Patosi → bashkohet me Fierin

-Divjaka → bashkohet me Lushnjën

-Selenica → bashkohet me Vlorën

-Maliqi → bashkohet me Korçën

-Këlcyra → bashkohet me Përmetin

-Memaliaj → bashkohet me Tepelenën

-Libohova → bashkohet me Gjirokastrën

-Cërriku → bashkohet me Elbasanin

-Belshi → bashkohet me Elbasanin

-Prrenjasi → bashkohet me Librazhdin.

Reforma e re territoriale është shoqëruar me debate të forta politike, protesta dhe kundërshtime nga qytetarët e zonave që preken nga ndryshimet e propozuara. Qindra banorë kanë dalë në protesta për të kundërshtuar shkrirjen e bashkive të tyre, duke aargumentuar se kjo do të vështirësonte marrjen e shërbimeve për shkak të distancës dhe faktorëve të tjerë. Kundërshtime janë shprehur edhe nga kryetarë bashkish dhe këshilla bashkiakë, të cilët kanë ngritur shqetësime lidhur me pasojat që mund të sjellë bashkimi i njësive vendore./Dosja.al

Komisioni i Ligjeve

TIRANË- Komisioni i Ligjeve ka miratuar në parim projektligjin e Partisë Socialiste për hartën e re administrativo-territoriale. Mësohet se, projektligji u miratua me 8 vota pro dhe 5 kundër dhe parashikon uljen e numrit të bashkive nga 61 në 46.

Pas miratimit në parim, Komisioni ndërpreu për 30 minuta mbledhjen dhe pritet të vijojë me shqyrtimin e projektligjit nen për nen. Ndërkohë, jashtë ambienteve të Kuvendit, qytetarë nga bashkitë që preken nga ky propozim kanë protestuar kundër hartës së re territoriale./Dosja.al

Gent Strazimiri

TIRANË- Deputeti i Partisë Demokratike, Gent Strazimiri, dhe socialisti Ulsi Manja janë përplasur gjatë diskutimeve për Reformën Territoriale në Komisionin për Çështjet Ligjore. Strazimiri i kërkoi Manjës që të mos ndërhynte si një nga propozuesit e reformës, por të moderonte debatin mes palëve. Në vijim, Strazimiri ngriti edhe çështjen e përcaktimeve kushtetuese për organizimin vendor.

Pjesë nga diskutimi: 

Strazimiri: Manja ti nuk je një nga propozuesit. Modero debatin mes propozuesve dhe atyre që janë përballe. Reformë me 4 nene vetëm ju mund të bëni. Kjo është fatura e kripës. Të marrësh kripë badihava kur të çlirohet Shqipëria thotë komisari. E keni përdhunuar Kushtetuesen. A do ta kryesh detyrën apo e ke pushim? Kushtetuta thotë Komuna. GJK thotë mund të mos ketë komuna. 9 anëtarë të Kushtetueses, vetëm njëri e kaloi vetingun, doli me faqe të bardhë.

Manja: Qyteti ka edhe fshat, por ju ju le konotacion të keq, ka qenë një parrullë dikur që fshati rrethon qytetin. Si qenka kjo punë? Ku ka qytet pa fshatra./Dosja.al

Tedi Blushi

TIRANË- Sekretari i Përgjithshëm i Partisë së Lirisë, Tedi Blushi dhe kryetari i Komisionit të Ligjeve, Ulsi Manja, janë 'përplasur' gjatë diskutimeve për territorialen në Komisionin e Ligjeve. Teksa kundërshtoi propozimin e PS për Reformën Territoriale, Blushi i kërkoi Manjës që ta ndërpriste mbledhjen.

Blushi theksoi gjithashtu se PS nuk ka mandat që të marrë vendime për të detyruar banorë e familje për të përshkruar kilometra të rrugë dhe për të shpenzuar më shumë. Nga ana tjetër, Ulsi Manja iu përgjigj se nuk kishte nevojë për pikë në mandatin e katërt të PS, teksa ironizoi Blushin duke i thënë "Kujt i flet, vetes’.

Pjesë nga diskutimi:

Blushi: Çfarë po votoni sot? Përse nuk keni kurajon të dilni nga një urdhër kriminal që do t’u marrë në qafë të gjithëve? Dhe çdo vendimmarrje ka për t’ju përndjekur gjithë jetën. Do ju përndjekë në rrugë, do ju përndjekë në punë dhe në çdo vend tjetër. Ndërpriteni këtë mbledhje. Nëqoftëse jeni pengje të Edi Ramës, më mirë deklarojeni këtu, sepse do shpëtoni. S’mund të rrini gjithë jetën peng, sepse jeni mes dy zjarreve tani. Këtë protestues do ju përndjekin gjithë jetën. Ju s’keni mandat të merrni vendime për banorë e familje që i detyroni tani që jo vetëm të përshkruajnë kilometra rrugë, por edhe të shpenzojnë më shumë. Kush j’ua ka dhënë këtë mandat, Edi Rama? Fakti që më ndërpret nuk t’i shton pikët te Edi Rama. Ju e shikoni këtë si çështje pikësh, unë e shoh si çështje kombëtare. Ndërpriteni këtë mbledhje, sepse nuk do ju mbrojnë as makinat me xhama të zinj dhe as Garda e Republikës.

Manja: Po jo mor çfarë pikësh, s’kam nevojë për pikë unë në mandatin e katërt. Pikë të duhen ty o Blush, pikë të duhen ty, sepse t’i flet për socialistët, por ti çfarë elektorati ke? Kujt i flet ti, vetes./Dosja.al

TIRANË- Deputeti demokrat Eno Bozdo i ka kërkuar mazhorancës të ndalojë procedurën për reformën territoriale dhe të dëgjojë kundërshtimet e bashkive që preken nga ndryshimet. Gjatë diskutimit në Komisionin e Ligjeve, Bozdo tha se nuk është normale që procesi i reformës të shoqërohet me protesta nga bashkitë që parashikohet të shkrihen.

Bozdo kundërshtoi propozimin për shkrirjen e 15 bashkive, duke kërkuar që mazhoranca të ndalojë procedurën dhe të rikthejë konsultimet me njësitë vendore. Ai theksoi gjithashtu se opozita nuk synon bllokimin e reformës, por kërkon që të shqyrtohen alternativa që, sipas tij, u shërbejnë më mirë qytetarëve.

“Nuk është normale që të gjithë punët e këtij komisioni të bëhet me protesta. I ke të gjithë bashkitë në protestë poshtë, ata që shkrihen. Protestojnë se nuk janë dëgjuar dhe argumenti i tyre nuk është marrë parasysh. Zhduken 15 bashki në bazë të arsyetimeve të pabaza. Jeni ende në kohë të bllokoni procedurën. Duhet të bëni atë që me urdhër politik nuk e bëri dot Komisioni i Territoriales. Të dëgjonte të dilej me variantet më të mira. Opozita nuk ka pasur qëllim bllokimin përveçse propozimin e variantit më të mirë për qytetarët. I keni në rrugë që po protestojnë.
Cilët afate duhet të kapim? Kjo nuk kërkohet nga BE, nuk ka asnjë standard për pushtetin vendor apo numrin e njerëzve në bashki”, tha Eno Bozdo./Dosja.al

Tomor Alizoti

TIRANË- Deputeti i Partisë Demokratike, Tomor Alizoti, ka kritikuar reformën territoriale dhe mënyrën se si shumica socialiste po e trajton atë në Komisionin e Ligjeve. Gjatë diskutimit, Alizoti deklaroi se pas ndryshimeve qëndron një synim elektoral dhe se vullneti i komuniteteve lokale nuk mund të anashkalohet.

Ai theksoi se nuk mund të vendoset për ndarjen territoriale vetëm duke u mbështetur te forca e shumicës parlamentare, ndërsa kundërshtimi i komuniteteve lokale lihet mënjanë. Duke iu referuar konkretisht Përrenjasit, deputeti demokrat solli si shembull kundërshtimin e mundshëm të këshillit bashkiak ndaj ndryshimeve.

“Çdo veprim ka në vetvete një qëllim. Kush është qëllimi i reformës? Çdo reformë do kohë sepse flitet për territorin që prek njerëzit, nuk mundet që të mos merret parasysh dëshira e njerëzve që jetojnë atje. Nëse mini parlamenti i Përrenjasit për shembull del kundër, këshilli bashkiak, si mund t’u dilni kundër. Nuk mund të ushtroni forcën e shumicës për të realizuar gjithçka. Mjafton që njerëzit e asaj zone nuk e duan. Anashkaloni thelbin për qëllimet tuaja. Ky është një qëllim elektoral. Nuk mund të bëni një hartë elektorale për njerëzit që nuk e duan”, tha Tomor Alizoti./Dosja.al

TIRANË- Diskutimet për reformën administrativo-territoriale kanë shkaktuar debate në Komisionin e Ligjeve mes opozitës dhe mazhorancës. Deputetët e PD-së kundërshtuan mënyrën e konsultimit të projektligjit me bashkitë, duke akuzuar Kuvendin se po pengon nismën ligjore të opozitës. Nga ana tjetër, Kryetari i komisionit, Ulsi Manja, hodhi poshtë pretendimet dhe tha se propozimet e opozitës janë diskutuar në mbledhjet e mëparshme.

Demokratët theksuan se bashkitë nuk mund të ndahen vetëm mbi bazën e numrit të banorëve, duke sjellë si shembull vende të ndryshme ku ekzistojnë njësi vendore me rreth 1 mijë banorë. Ata u ndalën edhe te kundërshtimet e kryetarëve të bashkive dhe këshillave bashkiakë ndaj reformës.

Pjesë nga debati:

Oerd Bylybashi, deputet i PD: Na thatë se keni nisur shkresën për konsultim. Unë po them këtë gjë, Durrësi nuk e ka marrë. Sot ka mbledhje të përcaktuar të Këshillit Bashkiak dhe nuk i ka mbërritur. Kështu ka ndodhur edhe në bashki të tjera me shumë mundësi. Ky është një sabotim. Kuvendi në mënyrë të qëllimshme pengon iniciativën ligjore të opozitës që të konsultohet dhe të vijnë qëndrimet në lidhje me propozimin.

Saimir Korreshi, deputet i PD: Sot kemi njerëz në rrugë për këtë punë, kryetarë bashkish të majtë, të tredhur. Sepse gjithë kësaj kohe presioni ka qenë 10 për mosmbështetjen e kësaj nisme ligjore. Në të gjithë botën, edhe pse ka bashkia apo komuna me 1000-2000 banorë të shkrihen si gjalp. Ato bashki që do të shkrihen, do të mbeten si kafaze pëllumbash. Nuk vihet në parlament me arrogancë se kemi 83 deputetë, sepse të gjithë këshillat bashkiakë kanë votuar kundër nismës suaj ligjore. Janë 15 raporte bashkish që ju thoni se do t’i modifikojmë, por nuk janë plastelinë. Kështu që prisni nismën tonë ligjore. Kjo nuk është reformë, por nismë ligjore e njëanshme. Nëse doni të bëni diçka, hajde të ulemi, t’i dëgjojmë njerëzit.

Ulsi Manja, kryetar i Komisionit: I kemi diskutuar propozimet tuaja në dy mbledhje radhazi. Përse nuk merrni fjalën për të diskutuar në parim? Mund të shprehni mendimet tuaja politike si t’i doni. Kjo nuk futet në rend dite, e kemi diskutuar një herë./Dosja.al

Saimir Korreshi

TIRANË- Deputeti Saimir Korreshi ka kritikuar draftin e mazhorancës për Reformën Administrativo-Territoriale, duke akuzuar Partinë Socialiste se po ndërton një “hartë elektorale”. Duke folur në Komisionin e Ligjeve, deputeti i PD-së tha se bashkitë nuk mund të ndahen vetëm mbi bazën e numrit të banorëve, duke sjellë si shembull vende të ndryshme ku ekzistojnë njësi vendore me rreth 1 mijë banorë.

Korreshi u ndal edhe te kundërshtimet e kryetarëve të bashkive dhe këshillave bashkiakë ndaj reformës. Deputeti demokrat argumentoi se vullneti i banorëve duhet të jetë përcaktues në çdo ndryshim të hartës administrativo-territoriale.

“Në të gjithë botën, edhe pse ka bashki, provinca apo komuna me 1000 banorë, askush nuk tenton kundër vullnetit të tyre ‘t’i shkrijnë si gjalpë’. Këtu po lozet me termin, nuk po i shkrijmë por po i bashkojmë. Të gjitha godinat do ngelin  kafaze pëllumbash, dhe ata njerëz që sot ua kanë hequr mandatin. Kemi banorë të bashkisë Divjakë që ne iu kemi hequr mandatin në lidhje me këtë çështje. Nuk mund të vish në parlament me arrogancë se kemi 83 vota. Jo nuk i keni për këtë çështje se këshillat e bashkisë që kanë votuar kundër nismës tuaj janë ata përfaqësues parlamentar të vegjël të çdo bashkie. Pse nuk shkojnë deputetët e juaj që janë mandatuar dhe që do na votojnë këtë ligj shembullor. Qenkan më të zgjuar këta se gjithë ai milet që ka dalë në protestë. Pse nuk bëni këtë, meqë keni bërë edhe e premtja e zezë, ca quhet kjo Prania besnike, pse nuk shkojnë deputetët, që të marrin dy vezë surratit. Janë 15 raporte bashkish që themi do t’i modifikojmë por nuk janë plastelinë, po iu vihet dryni. Sot nuk është reformë kjo që bëni ju, është një nismë ligjore e njëanshme kundër raportit të OSBE/ODIHR që thotë se duhet të bëhet me konsensus. Hajdeni ulim të dy nismat, t’i dëgjojmë ata njerëz dhe të përcaktojmë përtej hartës elektorale. Ju keni zgjedhur një hartë elektorale.”, tha Korreshi./Dosja.al