Danimarka është përballur me një sulm të madh kibernetik, ku hakerët kanë siguruar qasje në të dhënat personale të 8.8 milionë personave përmes regjistrit kombëtar të popullsisë.
Ministrja për Çështjet Digjitale, Christina Egelund, e cilësoi rastin si një “incident jashtëzakonisht serioz”, ndërsa autoritetet kanë nisur hetimet për të përcaktuar përmasat e plota të shkeljes.
Sipas ministrisë, persona të paautorizuar kanë siguruar qasje në emrat, adresat dhe numrat CPR, që janë numrat personalë të sigurimeve shoqërore në Danimarkë. Të dhënat përfshijnë edhe persona që kanë vdekur ose janë larguar nga vendi.
“Ky është një incident jashtëzakonisht serioz. Së bashku me të gjitha autoritetet përkatëse, po përpiqemi të përcaktojmë përmasat e plota të incidentit”, tha Egelund.
Danimarka ka rreth 6 milionë banorë, ndërsa regjistri kombëtar përmban të dhëna për rreth 11 milionë persona, përfshirë qytetarë të vdekur dhe persona që janë larguar nga vendi.
Sipas qeverisë, hakerët nuk kanë depërtuar drejtpërdrejt në sistemin shtetëror, por kanë shfrytëzuar sistemin e një kompanie daneze që kishte qasje të ligjshme në regjistër.
Autoritetet kanë nisur një hetim për incidentin, ndërsa deri tani nuk kanë bërë të ditur se kush qëndron pas sulmit. Qeveria tha gjithashtu se qasja e kompanisë në regjistër nuk është revokuar.
